Nuk kanë fund bëmat e gjyqtarëve dhe prokurorëve të shkarkuar nga vetingu. Janë rreth 200 njerëz që janë larguar nga sistemi që kur nisi vetingu, por ajo që vihet re është se askujt nuk i hyri gjemb në këmbë.
Të gjithë janë larguar me pasuri qindra mijëra euro dhe pas shkarkimit po e shijojnë pasurinë, disa duke kryer investime në biznese dhe disa duke pushuar. Edhe pse BE dhe SHBA kanë kërkuar që të ndëshkohen emrat e shkarkuar dhe të ketë hetime penale për ta, jo vetëm që nuk po hetohen, por ata po marrin poste të reja.
Gazeta e ka deklaruar disa herë se shumë të shkarkuar dhe të dorëhequr i janë futur botës së avokatisë dhe janë bërë avokatë ose kanë hapur zyra avokatie. Mirëpo dje ka dalë në dritë dhe një fakt tjetër, ku emrat e dorëhequr janë bërë pedagogë në fakultetet e drejtësisë, si në universitete publike ashtu dhe në ato private.
Edhe pse ata janë cilësuar si të korruptuar, ata mësojnë studentët që do të jenë e ardhmja e drejtësisë. Alarmi është dhënë dje nga Qëndresa Qytetare. Sipas Migen Qiraxhiut, këta individë në momentin që janë të përjashtuar për 3 kriteret e vetingut, për pastërtinë e figurës, ligjshmërinë e pasurisë dhe aftësinë profesionale, kanë vijuar punën të pa shqetësuar duke dhënë mësim në institucionet arsimore.
“Po shohim sjelljen e disa figurave që janë përjashtuar nga sistemi i drejtësisë për lidhje me krimin e organizuar, paaftësi profesionale por edhe për fshehje të pasurisë. Janë nxjerrë nga dritarja e drejtësisë dhe po futen nga dyert e fakulteteve.”
Përfaqësuesja e Ministrisë së Drejtësisë tha së janë ngritur grupe inspektimesh, të cilët do ti verifikojë këto raste. “Dy drejtori me një staf të shtuar njerëzish në nivelin e inspektorëve që marrin në administrim të gjitha ankesat, raste denoncimi nga çdo qytetar dhe biznes”, tha ajo.
Të shkarkuarit bëhen avokatë
Sipas burimeve nga Dhoma e Avokatisë në Tiranë, mbi 90 për qind e gjyqtarëve dhe prokurorëve të shkarkuar në Shkallën e Parë, pra nga Komisioni i Pavarur i Kualifikimit janë pajisur me leje avokatie. Por cila është strategjia?
Pasi KPK shpall vendimin e shkarkimit, të gjithë i drejtohen Kolegjit të Posaçëm të Apelimit duke bërë ankimim. Gjatë kësaj periudhe ata janë të pezulluar dhe nuk ushtrojnë dot aktivitet i gjyqtar apo prokuror. Ky lloj vendimi ju jep atyre të drejtën që të ndjekin Shkollën e Avokatisë dhe të marrin licenca avokatie.
Sipas burimeve, të gjithë rendin ta bëjnë këtë gjë para se të vendosë KPA, pasi nëse kjo e fundit lë në fuqi vendimin e shkarkimit atyre ju hiqet e drejt që të pajisen me licencë. Duke ditur këtë gjë, të gjithë dynden të marrin licencat pas vendimit të KPA dhe më pas nuk u krijohet asnjë problem të ushtrojnë këtë profesion të ri.
Por dyshimet janë se kjo metodë po përdoret për të justifikuar pasuritë. Kohët e fundit është rritur presioni për të nisur hetimet ndaj të ngelurve në veting dhe SPAK ka hapur dosjet për disa emra, duke sekuestruar dhe pasuri. Momentalisht janë hapur hetimet nga SPAK vetëm për ish-anëtarët e Gjykatë së Lartë dhe Kushtetuese, ndërsa për emrat nga Apeli dhe Shkalla e Parë nuk ka asnjë lëvizje. Për këtë arsye që të gjithë tani po rikthehen në poste qoftë avokatë, qoftë pedagogë.
