Shefi i Qarkullimit Rrugor të Tiranës, Erion Ahmetaj, ka folur mbrëmjen e sotme për aksidentet rrugore.
Sipas tij Tirana prej 8 vitesh ka një rënie me 19 të vrarë më pak në krahasim me vitet tjera dhe sipas tij ky rezultat është atribut i punës së policisë.
Ai deklaroi në emisionin “Bardh a Zi” se përgjegjësi për aksidentet më së shumti kanë këmbësorët.
“Janë tre katër faktorë në ndodhjen e aksidenteve. Ajo që është më kryesorja, është respektimi i sinjalistikës nga këmbësorët, ku numrin më të madh të ngjarjeve rrugore në Tiranë e kapin këmbësorët për shkak të mosrepesktimit të rregullave të sinjalistikës horizontale dhe vertikale”, tha Ahmeti.
Çështja e aksidenteve rrugore në Tiranë ka qenë mjaft e ndjeshme kohët e fundit, kjo edhe për shkak të ngjarjeve që kanë tronditur kryeqytetin duke ndezur një sërë debatesh në opinionin publik.
Një prej tyre është shënuar disa javë më parë tek Ambasada italiane në Tiranë ku një shofer është futur me 150 km, ndërsa semafori ka qenë me të kuqe dhe në vijat e bardha kanë qenë duke kaluar disa kalimtarë.
Shoferi problematik, sipas raportimeve rezultonte i ndëshkuar me mbi 40 gjoba dhe sërish qarkullimi i tij rrugor nuk pengohej nga efektivët, qoftë edhe në një prej zonave më të ruajtura të Shqipërisë ç’ka ngjalli mjaft irritim te qytetarët. (TemA)
