Akademia e Shkencave i është përgjigjur dje zyrtarisht shefit të Urgjencës Skënder Brataj mbi studimin e përhapjes së Covid në vend. Kreu i Urgjencës Brataj, ka hedhur poshtë studimin se gjysma e Tiranës ka fituar imunitet ndaj virusit.
Në postimin e bërë nga akademia thuhet se ky reagim vjen për skeptikët dhe i përgjigjet disa pikëpyetjeve të ngritura rreth besueshmërisë së rezultateve të këtij studimi. Teksa i referohet studimit në shkrimin e publikuar akademia thotë se raporti është konsultuar edhe me operatorë të shërbimit shëndetësor, ndërsa theksohet se nga të dhënat e nxjerra numri i të infektuarve në vend është rreth 600 mijë, shifër e cila përkon edhe me studimin e kryer nga akademia.
“Ky raport është pohuar edhe nga operatorë të shërbimit tonë shëndetësor, që kanë njoftuar përmes medias se, megjithëse numri i individëve të diagnostikuar me Covid-19 në vendin tonë ishte rreth 60.000 në fund të vitit 2020, numri real i individëve të infektuar në vend duhet të jetë afër 600.000.
Duke qenë se në Tiranë është diagnostikuar rreth një e dyta e numrit të individëve të diagnostikuar me Covid-19 në gjithë vendin, kjo e dhënë përkon edhe me seroprevalencën 49.6 për qind të infeksionit Covid-19 në qytetin e Tiranës konfirmuar në fund të vitit 2020 me studimin nga ekspertët e Akademisë së Shkencave të Shqipërisë”, thuhet në postim. Po ashtu në shkrim thuhet se studimi është realizuar nga ekspertë dhe se është bërë për të njohur realitetin në vend sa i përket virusit.
Ndër të tjera, akademia sqaron se studimi në fjalë është kryer me të njëjtat procedura kërkimore me të cilat është bërë hulumtimi epidemiologjik i shkallës së prekjes së popullatës nga Covid-19 në një shumicë vendesh të Europës. “Studimi mbi seroprevalencën e virusit Sars-Cov-2 në popullatën shqiptare të qytetit të Tiranës, realizuar nga ekspertë të Akademisë së Shkencave, është kryer për të njohur realitetin dhe për të ndihmuar në parashikimin e pritshmërive të pandemisë së shkaktuar nga Covid-19, jo për të krijuar gjendje të caktuara iluzive, qofshin euforike, qofshin në anën e kundërt.
Studimi nuk ka karakter diagnostikues, por verifikues për situatën reale të shtrirjes së infeksionit nga Covid-19. Niveli i teknologjisë së testimeve imunologjike të përdorur në këtë studim është i njëjtë si në shumicën e vendeve të Europës apo SHBA”, thuhet në postim.
Fazat e studimit
Akademia e Shkencave po ashtu bën me dije edhe fazat në të cilat ka kaluar studimi. Sipas saj studimi ka pasur 3 faza ku përmendet publikimi i të dhënave, përgatitja e raportit si edhe publikimi përfundimtar. Po ashtu theksohet se të dhënat e nxjerra nga ky studim kanë qenë të mjaftueshme për të dalë në përfundimet në të cilat ka dalë studimi. “Studimet e kryera nga ekspertë të Akademisë së Shkencave kalojnë nëpër të njëjtat faza si të gjitha studimet që janë duke u zbatuar gjerësisht në botë në kushtet e pandemisë:
1. Publikimi i të dhënave paraprake apo operative; 2. Përgatitja e raportit shkencor dhe publikimi i tij në “pre-print”; 3. Publikimi përfundimtar i raportit shkencor të rishikuar nga kolegë ekspertë, një proces që kërkon shumë muaj. Në komunikimet e deritashme janë ofruar aq të dhëna sa janë të nevojshme për të kuptuar gjendjen nga opinionet publike. Të dhëna të tjera janë të mundshme të këshillohen nga specialistë ose operatorë të administratës së shërbimit shëndetësor edhe para përfundimit të fazës së tretë, të nxjerrjes së konkluzioneve të studimit”, bëhet me dije në postim.
Sakaq, duke iu referuar raporteve botërore në postimin e akademisë thuhet se numri i të infektuarve real me virusin Sars-Cov-2 mund të jetë deri 10-15 herë më i lartë se numri i të sëmurëve me Covid-19 evidencuar nga shërbimi shëndetësor, raport i cili ndryshon në vartësi të shtrirjes së testimeve depstiuese serologjike.
