Shuhet Ndoc Çefa, artisti që i kushtoi jetën teatrit dhe kinemasë shqiptare.
Arti shqiptar është në zi. Është ndarë nga jeta aktori dhe regjisori i njohur shkodran, Ndoc Çefa, një emër që për dekada kontribuoi në teatrin, kinemanë dhe jetën kulturore të vendit.
I lindur në Shkodër, Ndoc Çefa e ndërtoi karrierën e tij në skenë dhe pas kamerës, duke lënë gjurmë si aktor, regjisor dhe drejtues institucionesh artistike. Pas viteve ’90 ai drejtoi Teatrin “Migjeni”, ndërsa më herët kishte ushtruar detyra edhe në Kinematografinë Shqiptare, në Shtëpinë e Kulturës dhe Estradën Profesioniste të Kukësit, si edhe në institucionet kulturore të Shkodrës.
Publiku e kujton për interpretimet në filmin “I teti në bronz”, ku luajti rolin e skulptorit Andoni, si dhe në serialin televiziv “Flaka e maleve”, duke qenë pjesë e brezit të artistëve që ndërtuan historinë e kinemasë shqiptare.
Përtej skenës, Çefa ishte aktiv edhe në jetën publike. Ai mbajti detyrën e kryetarit të Këshillit Bashkiak të Shkodrës gjatë viteve 2000–2003 dhe ishte ndër artistët e parë shqiptarë që rivendosi bashkëpunimin kulturor me kolegët nga Beogradi, duke punuar gjithashtu edhe me regjisorin francez Dominique Dolmieu.
Ndarja e tij nga jeta lë një boshllëk në komunitetin artistik dhe kulturor të Shkodrës, qytetit të cilit i kushtoi pjesën më të madhe të veprimtarisë së tij.
Familjarë, miq, kolegë dhe artdashës i dhanë lamtumirën një artisti që me punën dhe përkushtimin e tij la një trashëgimi të vyer në kulturën shqiptare.
U prehtë në paqe, Ndoc Çefa (1943–2026).
