Në prag të zyrtarizimit të qeverisë së re malazeze të Dritan Abazoviç duket se ky shtet do t’i bashkangjitet nismës rajonale Ballkani i Hapur. Jakov Milatoviç, ministër malazez i Zhvillimit Ekonomik i tha Zërit të Amerikës në Uashington se çdo iniciativë që synon integrimin ekonomik rajonal duhet të merret parasysh.
Në angazhimin tim profesional, në një periudhë të dhjetë viteve të kaluara, dhe para se të vija në Qeverinë e Malit të Zi, kam investuar shumë përpjekje në përmirësimin e marrëdhënieve rajonale në Ballkanin Perëndimor.
Ajo që mungon aktualisht në Ballkanin e Hapur janë mekanizmat shtesë të caktuar të institucionalizimit të asaj nisme, por mendoj se në parim është nismë e mirë.
Mendoj se edhe Mali i Zi përmes potencialit të tij lider në aspektin e integrimit evropian, mund t’u sigurojë të gjitha vendeve të Ballkanit Perëndimor një kontribut shtesë, dhe përmes kësaj iniciative rajonale, të gjithë së bashku të bëjmë përparim më të fuqishëm drejt Bashkimit Evropian.
Milatoviç deklaroi se pronat e oligarkëve rusë të sanksionuar do të konfiskohen në Mal të Zi, sipas shembullit të Bashkimit Evropian, në periudhën në vijim. Për të përballuar rritjen e çmimeve në treg në Malin e Zi pritet ulja e akcizës për karburantet, TVSH-në për disa produkte ushqimore, si vaji dhe mielli.
