Hera e vetme që Albin Kurti foli për Dick Marty-in dhe deklaratën e tij se serbët ia planifikuan vrasjen, ishte kur u pyet nga gazetarët në një konferencë për media.
Kjo, edhe përkundër se informacioni që doli nga emisioni hulumtues në Zvicër për nga pesha u konsiderua ritraumatizim potencial për themelet e shtetit të Kosovës.
Hartuesi i raportit famëkeq për gjoja transplantimin e organeve nga UÇK, planifikohej të vritej nga nëntoka serbe, e që përsëri faji t’u mbetej kosovarëve, të cilët për hakmarrje do ta eliminonin zviceranin.
Por, për befasinë e shumë kujt politika zyrtare në Kosovës qëndroi e heshtur.
Përveç që nuk u trajtua, për shokun që realizimi i kësaj vrasje do t’i sillte Kosovës, partia në pushtet shfrytëzoi momentumin që t’i bëjë një lakesë.
Përmes një shkrimi në Facebook, Vetëvendosje e ka përmendur Marty-in, por vetëm si shkaktarin që e detyroi Hashim Thaçin të fillojë një dialog jo të favorshëm për Kosovën.
“Në 8 mars të vitit 2011 qeveria e atëhershme filloi bisedimet politike me Serbinë të cilat i quajti bisedime teknike. Këto bisedime filluan vetëm tre vjet pas shpalljes së pavarësisë, tetë muaj pas fitores së Kosovës në Gjykatën Ndërkombëtare të Drejtësisë (GjND) e cila vulosi legalitetin e shpalljes së pavarësisë, 5 muaj pas rezolutës së OKB-së e cila bënte thirrje për dialog për promovim të bashkëpunimit, progresit dhe përmirësimit të jetës së njerëzve, dhe as 3 muaj pas “të gjeturave” të Raportit Dick Marty”.
Gjithë procesin e dialogut, që Vetëvendosje në këtë status në Facebook e konsideron krejtësisht të dëmshëm, partia e sheh kauzalisht të lidhur me raportin e ish-anëtarit të Këshillit të Evropës.
Kritika për Thaçin dhe gjithë kastën e atëhershme politike nuk ndalet me Marty-in.
“Këto bisedime politike, e që në fakt ishin negociata për çështje të brendshme, udhëhiqeshin nga njerëz të kompromiseve me Serbinë. Ishin pa parime, pa kufizime dhe pa transparencë”, shkroi LVV.
Ky status nga Vetëvendosje erdhi në përvjetorin e nëntë të Marrëveshjes së Brukselit ku u vendosen edhe parimet për formimin e Asociacionit të Komunave me Shumicë Serbe.(Albaniapost)
