Amerikanët duken të vendosur për të mos lejuar në politikë jo vetëm të inkriminuarit, por edhe emrat e korruptuar.
Ditën e djeshme ambasadorja amerikane ka lëshuar silurin e radhës për tre krerët e partive kryesore politike në vend, duke ua bërë të qartë se këtë herë nuk mund të ketë lojëra me emrat e kandidatëve për zgjedhjet e 25 prillit.
Pavarësisht ligjit të dekriminalizimit, partitë kanë arritur të infiltrojnë individë të lidhur me krimin e korrupsionin (pavarësisht se mund të mos jenë dënuar), duke shmangur parashikimet në draft. Por këtë herë SHBA duket e vendosur për të mos lejuar manovra, pasi duhen njerëz të pastër dhe të pa “damkosur”. Të enjten ambasadorja në një intervistë televizive iu drejtua drejtpërdrejt kryeministrit, kreut të PD dhe kryetares së LSI, ndërsa dje dha një tjetër mesazh të ngjashëm.
Duke folur në konferencën “Kostot e Demokracisë 2 – Paraja dhe Politika, sfidë ende në vazhdim”, ambasadorja kërkoi që përveç të inkriminuarve, të mbeten jashtë listave dhe politikanët e korruptuar. “Jemi duke ndjekur punën e institucioneve përgjegjëse për administrimin e zgjedhjeve, për t’u siguruar që zgjedhjet e ardhshme parlamentare të 25 prillit të jenë të lira, të drejta dhe transparente.
Gjithashtu, ne po punojmë me partitë politike, duke i nxitur që të përmbushin detyrimet e tyre ligjore dhe të punojnë për të ndërtuar besimin e popullit shqiptar duke paraqitur lista kandidatësh që nuk fyejnë votuesit, nuk minojnë demokracinë apo nuk promovojnë korrupsionin. Fillimisht, drejtuesit e partive duhet të heqin nga radhët e tyre çdo politikan të korruptuar apo të lidhur me krimin dhe të mos i vendosin ata në fletën e votimit.
Zbatimi i plotë i dekriminalizimit është thelbësor për të ardhmen Euro-Atlantike të Shqipërisë”, tha ajo. Fokusi i ambasadores te korrupsioni, është një mesazh se në lista nuk mund të futen gjyqtarët dhe prokurorët e korruptuar. Pra emrat e shkarkuar nga vetingu. Po ashtu dhe zyrtarë të cilët janë me dosje në prokurori për afera. Kemi disa ministra, deputetë e ish-kryebashkiakë në prokurori.
Boll tallje me votuesit
Sipas ambasadores, Shqipëria kërkon të anëtarësohet në Bashkimin Europian, prandaj duhet të sigurojë që zgjedhjet të jenë të lira dhe të ndershme, me kandidatë me integritet, të cilët mund të përfaqësojnë me nder interesat e popullit shqiptar.
Ajo kërkoi që politika të mos tallet me votuesit. “Populli shqiptar meriton të ketë besim në institucionet e tij, ai meriton ta hedhë votën e tij në një proces transparent, të lirë nga presioni kriminal dhe spektri i korrupsionit, si dhe meriton të shohë udhëheqjen e partive politike dhe përfaqësuesit e tyre në Kuvend, duke iu shërbyer interesave të të gjithë shqiptarëve.
Por, përgjegjësia për të përmirësuar sistemin zgjedhor të Shqipërisë nuk bie mbi një person, një institucion apo një parti politike. Në fakt – të gjithë duhet të jenë pjesë e kësaj përpjekjeje. Secili nga ju që merr pjesë në këtë aktivitet, si dhe njerëzit e organizatat që ju përfaqësoni. Të gjithë kanë një rol të rëndësishëm për të luajtur në farkëtimin e demokracisë, që ju dëshironi dhe meritoni”, tha ajo.
Kujdes me financimin e partive
Një tjetër pikë ku u ndal ambasadorja është ajo e financimit të partive. Ka pasur shumë skandale në këtë aspekt dhe ajo kërkoi që të merren masa. “Por, kush shfaqet në fletën e votimit është vetëm një pjesë e zgjidhjes. Partitë politike duhet ta marrin seriozisht detyrimin e tyre për të siguruar transparencën e financimit të partive.
Ne u bëjmë thirrje të gjitha partive politike të bëjnë transparente financimet e partive dhe fushatave të tyre, si dhe të bëjnë publike deklaratat e pasurive të të gjithë kandidatëve. Ashtu siç kemi punuar me sistemin e drejtësisë për të kontrolluar integritetin e gjyqtarëve, kështu po kërkojmë edhe kontrolle – kontrolle të hollësishme – të kandidatëve për poste publike. Populli shqiptar e meriton këtë”, tha Kim.
