Ambasadorja amerikane Yuri Kim përcolli dhe njëherë mesazhin e mbështetjes së fortë amerikane mbi Reformën në Drejtësi, njëherësh duke vlerësuar arritjet e deritanishme.
Në një intervistë në Real Story përballë gazetarit Sokol Balla, Kim, referuar mesazheve që përcjell heraherës për opinionin, tha se në to nuk ka marifete të marrëdhenieve me publikun por një vërtetësi qëndrimesh të qarta.
“Unë nuk bëj ato marifete marrëdhëniesh me publikun. Unë jam e interesuar në rezultate. Prandaj, ju e dini, unë nuk bëj premtime të mëdha.
Gjithçka mund t’ju them është se Shtetet e Bashkuara e kanë shumë seriozisht Reformën në Drejtësi, se e kemi shumë seriozisht korrupsionin, se e kemi shumë seriozisht ndërtimin e një marrëdhënieje me Shqipërinë, e cila është e fortë në demokraci, mbrojtje, dhe biznes”, tha Kim.
Duke iu përgjigjur skeptikëve, ambadorja Kim ftoi për durim në shijimin e rezultateve të reformës, sidomos në ndëshkueshmërinë e atyre që deri dje ishin të paprekshëm.
“Mendoj se po filloni të shihni rezultate. Keni parë disa çështje të mëdha të nisin duke filluar nga vera e kaluar, dhe ajo që ndodh në fund është bërja e dallimit midis propagandës dhe faktit.
Ka disa të cilët duan që ju të besoni se Shqipëria ka qenë gjithmonë e korruptuar dhe se do të jetë gjithmonë e korruptuar dhe se nëse nuk jeni dakord, ju jeni naiv.
Epo, kam një lajm për ju: kjo nuk është normale dhe kjo nuk është mënyra se si ka qenë gjithmonë Shqipëria.
Unë besoj tek Shtetet e Bashkuara dhe arsyeja përse besoj në Shtetet e Bashkuara nuk është sepse ne jemi perfekt, por sepse përpiqemi të përmirësohemi. Unë besoj tek Shqipëria për të njëjtën arsye.
Ky nuk është vend i përkryer. As Shtetet e Bashkuara nuk janë, por unë mendoj se populli shqiptar ka mjaftueshëm pasion dhe përkushtim për të sjellë ndryshim”, arsyetoi ambasadorja amerikane.
Sipas saj, nuk duhen dëgjuar ata zëra që thonë se Shqipëria s’mund të ndryshojë për mirë. Ata thonë gënjeshtra, gjykoi Kim.
“Unë besoj tek Shqipëria, besoj tek populli shqiptar dhe mendoj se ju kurrë nuk duhet të ndalni së shpresuari.
Këta njerëz, të cilët ju thonë se nuk po ndodh asgjë dhe se asgjë nuk do të ndodhë kurrë, nuk janë njerëz të cilët ju tregojnë të vërtetën.
Ata po ju thonë një gënjeshtër, në mënyrë që të mund të vazhdojnë me çfarëdo aktiviteti të tmerrshëm ku janë të përfshirë. Mos e humbni shpresën. Shpresa është armë”, theksoi gruaja që përfaqëson SHBA në Shqipëri.
