Qeveria shqiptare ka dërguar në Kuvend projektligjin për ratifikimin e ndryshimit të marrëveshjes së koncesionit për aeroportin “Nënë Tereza”.
Në relacionin për projektligjin qeveria kërkon ndryshimin e afatit të marrëveshjes koncesionare, nga 22 vite në 35 vite. Sipas kësaj marrëveshje koncesioni mund të përfundojë në vitin 2038.
Në relacion qeveria thekson se koncesionari do të kryej një sërë investimesh në vlerën e 99 milionë eurove dhe parashikohet te kryhet nëpërmjet zgjatjes së pistës, zgjerim të terminalit të pasagjerëve.
“Kërkohet edhe shtimi në marrëveshjen fillestare të klauzolës 4.4.1 mbi bazë të së cilës listohen detyrimet shtesë që merr përsipër shoqëria koncesionare të realizojë në kuadër të planit të saj të investimeve, si edhe “ndryshimin e një togfjalëshi në shkronjen “a”, të klauzolës 4.8, pasi, si pasojë e këtij togfjalëshi, shoqëria koncesionare nuk kishte vijuar me një nga 4 detyrimet e saj, pikërisht atë të zgjatimit të pistës, pasi nuk ishte plotësuar kushti ligjor që po eliminohet nëpërmjet këtij ndryshimi.
Me këtë ndryshim, shoqëria koncesionare është e detyruar të vijojë me zgjatimin e pistës së aeroportit referuar parashikimit kohor të përcaktuar mes palëve”.
Krahas investimeve, është parashikuar edhe ulja e tarifave të udhëtimit në minus 20% për të rritur dhe minus 40 % për të miturit.
