Pothuajse një muaj jemi nën ndikimin e masave të fuqishme ajrore anticiklonike të cilat kanë kushtëzuar mot të qëndrueshëm dhe mjaft të nxehtë, por siç duket ndryshimi i kushteve të motit po duket në horizont.
Masat ajrore mjaft jo-stabile nga Atlantiku po depërtojnë në drejtim të Evropës dhe disa nga to do të fillojnë të depërtojnë edhe në drejtim të rajonit tonë nga Evropa perëndimore, megjithatë temperaturat nuk do të pësojnë ndonjë ndryshim të madh.
Në viset bregdetare do të kemi ulje të temperaturave për shkak të reshjeve dhe rrebeshe të shiut me vetëtima dhe bubullimë, por prapëseprapë do të ketë intervale kohore me diell dhe nxehtësi kalimtare. Gjatë kësaj jave viset bregdetare do të kenë reshje më të shpeshta shiu, kurse në viset kontinentale reshje do të jenë më të pakta.
Pra, ndryshimi i motit do të fillojë nga e marta kur pritet të ketë rrebeshe lokale shiu në shumë pjesë të rajonit tonë. Priten erëra kryesisht nga jugu si dhe alternime vranësirash, intervaleve kohore me diell dhe rigave të shiut apo rrebeshe me vetëtima dhe bubullimë. Reshjet nuk do të jenë gjithëpërfshirëse ende, por do të vijnë duke u zgjeruar të martën dhe të mërkurën. Ditën e enjte reshjet do të jenë më sporadike, kurse të premten do të pushojnë fare.
Sipas ecurive aktuale sinoptike për fundjavë në Italinë Veriore pritet të formohet një ciklon i fuqishëm i cili do të depërtojë edhe tek ne duke kushtëzuar reshje të dendura shiu dhe rrebeshe lokale shiu me vetëtima dhe bubullimë. Krejt në fund të javës temperaturat pritet të shënojnë ulje të ndjeshme.
Ishte ky parashikimi i motit për këtë javë dhe normalisht ndryshimet në parashikim mund të ndodhin. Nëse kemi ndonjë ndryshim eventual do tu lajmërojmë në postimet tona të përditshme.
