Presidenti Ilir Meta, në vijim të aktivitetit të tij publik, edhe sot u shndërrua sërish në një predikues morali.
Teksa i bënte thirrje partive në vend që të mos blinin më vota, ai indirekt vendoste në pikëpyetje ligjshmërinë e parlamentit të sotëm dalë nga zgjedhjet e vitit 2017.
Padyshim është një deklaratë politikisht korrekte që i takon të përcillet nga kreu i një shteti i cili me të drejtë duhet të sigurohet që vullneti i qytetarëve për të zgjedhur, të jetë i lirë dhe i pamanipulueshëm.
Ndërkohë, ajo që nuk shkon në të gjithë këtë histori është titullari që e përcjell këtë mesazh, gishti akuzes i të cilit sa herë bëhet fjalë për shitblerje votash drejtohet kudo tjetër përpos forcës politike që ka drejtuar prej vitesh.
Edhe pse e njohur për zarfet e parave, shpërblimet me vende pune, pushimet në Jalë për të rinjtë dhe favoret e shumta në zyrat e shtetit, LSI sot falë “predikuesit” të saj i dikton shqiptarëve standardin e moralit.
Por për të sjellë në kujtesë orët e fundit të Ilir Metës si kryetar i LSI-së, po përcjellim një material të publikuar në media në prag të zgjedhjeve të vitit 2017.
Në video, prapa kurrizit të Metës shfaqet ish-kryetari i Bashkisë së Lezhës për dy mandate, njëkohësisht kryesuesi i liastës së kandidatëve për deputetë në qarkun e Lezhës, Viktor Tushaj.
Ky i fundit i jep Gjovalin Gjinit, një militanti të LSI-së një zarf me para ku më von përpiqet ta justifikojë që donte ta linte te filxhani i kafesë por kishte harruar.
Ai e ka ndjekur teksa po zbrisnin nga shkallët dhe në “fshehtësi”, të paktën kështu kujtonte, i ka futur zarfin në xhep në prezencë të Metës.
Ndërkohë, ky është vetëm një fragment i orëve të fundit si kryetar i LSI-së pa rikujtuar të tjerat të cilat mesa duket presidenti i sotëm ose i ka fshirë nga kujtesa, ose të gjitha videot ku ai shfaqet me zë dhe figurë janë të montazhe siç ai preferon t’i cilësojë. (TemA)
