I dashur Ilir,
Morëm vesh se kishe qenë nga këto anë. Na bëhet qejfi evlat. Ne mikun e kemi të shenjtë. Megjithëse duhet ta dish se Selenica nuk është Vlorë a të….nejse. Do mësosh edhe ti, se nga Çepani je.
Për herë të parë det pe kur të sollën në kampin e pionierëve. Kishe thënë që vjen kur të duash. Tani që ta sqarojmë këtë punën, kur të duash vjen ti, se vijnë një milion turistë çdo vit. Vijnë, hanë, lahen, flenë e ikin prapë, dhe janë të mirëseardhur.
Vetëm se po e vure si punë basti që vjen si trim të ngresh flamurin te Sheshi Flamurit, duhet ta marrësh pak shtruar. Do na pyesësh një herë ne. Se edhe ai burri që e ngriti i pari, pavarësisht se ishte bej i Vlorës e djali ynë, erdhi me të butë e shtruar shtruar. Se edhe Hysni Kapua që ishte djalë ynë thoshte që Vlorës duhet ti rrish tek ullishtet derisa të marrësh leje. Se po e zure me inat, nuk ke punë me Damianin, se Damianin këndej nuk e ka njeri në refene. Pyet një herë edhe atë plakun që ke në krah, se ai e di më mirë si futesh nga këto anë. Se nuk e bën dot “Tokë e Xanun” këtu a të….
Kishe bërë edhe një deklaratë për Edin. Tani dëgjo pak, dhe kije vath në vesh: Ai është nip në këtë qytet. Dhe dajua shtie pushkë për nipin. Po ti nuk e di, se je i ri dhe ke ikur shpejt nga fshati. E që ta ngasim llafin, ne edhe mbase e themi ndonjë llaf, dhe kjo quhet kritikë. Por kur e bëjnë të tjerët, quhet e sharë. Dhe ne nuk kemi midé të mbajmë të sharat. Nuk shquhemi për gjakftohtë.
Ndaj djalo, hajde sa herë të duash këndej. Ndalu edhe në shesh të Flamurit sa herë të duash. Edhe ndonjë dekoratë na e jep se i pëlqejmë. Vetëm gojës mos i jep shumë. Se nuk dihet si të pret gjuha dhe pastaj të nxjerrin gomat xixa sa të kapësh Fierin./dritare.net
