Aleksandër Pogaçe (1943-2016). Aktor. Lindi në Fier, me 16 tetor. Ishte biri i aktorit të humorit të Estradës së Fierit, Nestor Pogaçe. Mbaroi shkollën e lartë për aktor “Aleksander Moisiu”, në vitin 1964. Filloi punë si aktor në Teatrin e Vlorës, më pas në atë të Fierit dhe të Gjirokastrës.
Gjatë veprimtarisë së gjatë skenike në këto teatro ka krijuar figura artistike të spikatura, që kanë kontribuar në ngritjen e nivelit të shfaqjeve duke qenë i përkushtuar dhe shembull i një pune këmbëngulëse, serioze e me pasion.
Priret më fort kah një loje e tipit emocional, me shpërthime të befta, sikundër edhe nga nënvizimet e rrafsheve ironike, cinike, gjendjeve të dyfishta, shpotise, si në shfaqjet “Lavirja e denjë për respekt”, “Pas dyerve”, “Filomena Marturano” etj.
Ka marrë pjesë me role të rëndësishme në 9 filma, si: doktori te “Mëngjese të reja” (1980), togeri Franc te “Dëshmorët e monumenteve” (1980), Peteri te “Kërcënimi” (1981), Shtajneri te “Thesari” (1981), Reshiti te “Një ëmër midis njerëzve” (1983), Faruçio te “Guri i besës” (1986), Theofani te “Botë e padukshme” (1987). Ka interpretuar gjithashtu në mjaft regjistrime televizive. Ndahet nga jeta më 16 mars 2016.
