Kryeministri Edi Rama ka deklaruar dje se qëllimi final mes Kosovës dhe Shqipërisë është heqja e kufijve. Dje u mbajt takimi i radhës mes dy qeverive, ku në një konferencë të përbashkët për media me kryeministrin e Kosovës, Avdullah Hoti, Rama u shpreh se askush nuk mund të bëhet pengesë për “bashkimin” e dy shteteve duke hequr çdo pengesë kufitare.
Sipas kryeministrit, heqja e kufirit është edhe në zbatim të 4 lirive të BE për rajonin, duke u bërë thirrje dy ministrive të Brendshme që të nisin përgatitjet për krijimin e databazës të përbashkët për të kontrolluar në kohë reale hyrje-daljet në pikat kufitare. Ky veprim sipas Ramës do të sillte edhe hapjen përfundimtare të kufirit mes Shqipërisë dhe Kosovës.
“Ambicia jonë është heqja e kufirit, në funksion të zbatimit të katër lirive të Bashkimit Europian në rajonin tonë, duke filluar nga më e thjeshta dhe më kuptimplota po ashtu, heqja e kufirit mes Shqipërisë dhe Kosovës. Besoj se është e rëndësishme që dy ministritë e Brendshme të vendeve tona të intensifikojnë punën për të krijuar databazën e përbashkët dhe për të mundësuar kontrollin në kohë reale të hyrjeve dhe daljeve në të gjithë pikat kufitare të perimetrit të përbashkët, gjë që do të na mundësonte hapjen përfundimtare të kufirit, pa humbur asnjë centimetër në frontin e betejës kundër aktiviteteve të paligjshme dhe kundër çdo forme abuzimi me lirinë e lëvizjes”, tha Rama.
Më tej kryeministri deklaroi se bashkimin e plotë të dy shteteve nuk mund ta ndalë askush. Sipas tij, arritja e marrëveshjeve mes Shqipërisë dhe Kosovës dhe zbatimi i tyre nuk ka nevojë për asnjë palë pasi çdo pikë është e shkruar në të njëjtën gjuhë dhe kuptohet dhe lexohet qartë nga të dyja palët.
“Unë besoj se bashkëpunimi ynë në këtë drejtim sot është i hapur plotësisht. Koha e mureve ideo-psikologjike besoj që ka kaluar e duhet ta shfrytëzojmë këtë moment e ta bëjmë atë kohë të pakthyeshme, duke i kryer një nga një të gjitha detyrat që imponon vendosja e të katër lirive të Bashkimit Europian plotësisht, në radhë të parë në territorin mes nesh ku nuk na pengon askush e nuk kemi nevojë as për përkthyes për marrëveshjet e përbashkëta, sepse i shkruajmë në të njëjtën gjuhë, i lexojmë në të njëjtën gjuhë dhe i kuptojmë nga e njëjta gjuhë”, tha Rama.
Shengeni Ballkanik Më tej, Rama vijoi se bashkëpunimi rajonal do t’i shërbejë rinisë shqiptare, në Shqipëri, Kosovë e kudo qoftë. Sipas tij, projekti i të rinjve është projekti i daljes përfundimtare nga kurthi i historisë, që do të krijojë më shumë frymëmarrje dhe mundësi.
“Projekti i Shengenit Rajonal është projekti i rinisë shqiptare, i rinisë shqiptare në Shqipëri, në Kosovë e kudo qoftë. Është projekti i të gjithë atyre që ende sot janë në kopsht, ende sot janë në shkollën fillore, ende sot janë në një moshë pa të drejtë vote dhe për të cilët është përgjegjësia jonë e madhe të vendosim.
Është projekti i të rinjve, sepse është projekti i daljes përfundimtare nga kurthi i historisë dhe i spostimit tonë në një hapësirë më të madhe, e cila jo vetëm do të na krijojë të gjithëve shumë më tepër frymëmarrje e shumë më tepër mundësi në çdo aspekt, jo vetëm do ta kthejë këtë rajon nga një vrimë e zezë në perceptimin e të tjerëve në një zonë atraksionesh dhe mundësish për investime, por edhe do të kryejë një mbështetje të madhe për të gjithë për integrimin përfundimtar në Bashkimin Europian”, tha Rama.
