Aktorja Itziar Ituño, që interpreton Raquel Murillo (Lisbona) te “La Casa de Papel”, njoftoi më 18 mars se ishte prekur nga koronavirusi, mesazh që i la fansat shumë të shqetësuar.
Por, tani, pasi kaloi karantinën e izoluar në shtëpi, ajo është rikuperuar dhe po ndihet shumë më mirë. Eksperiencën e saj e rrëfeu gjatë një emisioni radiofonik, duke thënë e ndjeu nevojën ta tregonte sepse e kuptoi se “gjithçka që ndodhte nuk po merrej seriozisht”.
“Ky nuk është një grip, është shumë më i rrezikshëm. Duhet të jeni shumë të kujdesshëm”, duke siguruar se në rastin e saj ishte i butë, por kishte kaluar një periudhë të keqe. Ndërsa tregoi se partneri i saj ishte shumë më keq.
“Fillon me një kollë të thatë dhe të nesërmen zgjoheni me ethe. Në përgjithësi, burrat e kalojnë më vështirë, kështu që, pas nëntë ditësh nga ethet, ai përfundoi në spital, për tetë ditë rresht dhe me mjaft probleme”.
Aktorja tha se nuk dëshiron të krijojë alarm, por “është një çështje shumë serioze” dhe ajo dëshiron që të gjithë të jenë të vetëdijshëm se secili person sulmohet në një mënyrë ndryshe: “Duket si një virus i zgjuar”.
Lidhur me simptomat, ajo tha se nuk thuhen të gjitha. “Fillimisht nis me humbjen 100% të nuhatjes. Nuk nuhasni asgjë dhe nuk ndjeni absolutisht asnjë shije. Për 15 ditë është shumë e frikshme. Gjithashtu ka dhembje koke, cistit, dhimbje muskulore… “.
