Ngritja e Gjykatës Kushtetuese është një ndër 5 kushtet për hapjen e negociatave të Shqipërisë me Bashkimin Europian. Politika në vend u zotua se Kushtetuesja do të jetë funksionale brenda muajit dhjetor. Gjasat janë që njerëzit e politikës, nuk do të mund t’i mbajnë premtimet publike.
Kjo, pasi procesi për verifikimin e emrave që synojnë një post ne këtë institucion, është kompleks dhe zgjat në kohe. Kryetarja në detyrë e Këshillit të Emërimeve në drejtësi Vitore Tusha shpjegoi arsyet e vonesave.
Në një reagim zyrtar ajo rendit disa nga faktorët që ndikojnë në marrjen e vendimeve ne lidhje me kandidatët. Ajo sqaron se nevojitet një kohë e relativisht e gjatë për të bërë një hetimi të thelluar për kandidatët, përderisa përfshihen një sërë institucionesh dhe agjensi ligjzbatuese.
Ecuria e punës së këshillit shpjegon zonja Tusha varet edhe nga shpejtësia me të cilën punojnë institucionet e vettingut. Sepse në respekt të rekomandimeve të komisionit të Venecias, për kandidatët që vijnë nga brenda radhëve të sistemit, duhet të pritet përfundim i procesit të vettingut.
Një tjetër arsye që duket se ka zvarritur procesin, është edhe vonesa për pajisjen me certifikatë sigurie të anëtarëve të Këshillit, çka i pengonte këta të fundit të kishin akses në informacionin e klasifikuar për kandidatët.
Një propozim i bërë në korrik 2020 nga Avokati i Popullit që kandidatët të hetoheshin edhe në lidhje me kriterin e mospërfshirjes në veprimtari politike, duket se është bërë shkak që procesi të kërkojë më shumë kohë.
Për kryer verifikime të plota për kriterin politik, sqaron Vitore Tushai, iu drejtua me shkrese Komisionit Qendror të Zgjedhjeve me pas 53 partive, të cilave u kërkoi informacion për secilin kandidat.
Fajtore për vonesat kryetarja në detyre e Këshillit, bën edhe pandeminë. “Situata e imponuar nga gjendja e krijuar nga përhapja e virusit Covid 2019, solli pezullimin e veprimtarisë së institucioneve.
Në këtë periudhë konsiderua mundësia e komunikimit elektronik apo e zhvillimit të mbledhjeve online, por u vlerësua se kjo nuk garantonte kërkesën ligjore që mbledhjet të mbahen të mbyllura”, -thekson Tusha.
Pavarësisht, problematikave Këshilli informoi se puna ka vijuar dhe për vendin veçantë të shpallur nga presidenti Republikës, ka kualifikuar dy kandidatët, Eugen Papandile dhe Sonila Bejtja dhe do të vijojë me shqyrtimin e mëtejshëm të dosjeve.
Ndërsa, informoi se përjashtoi nga gara kandidatët, Sergjio Mazreku, Sinan Tafaj, Shaqir Hasanaj dhe Zhaklina Peto.
