Mbushen sot plot 35 vjet që është ndarë nga jeta aktori i mirënjohur korçar Thimi Filipi. Nderim dhe respekt për figurën e tij! Thimi Filipi (1923-1990) lindi më 1 mars 1923 në Korçë, u terhoq si aktor profesionist në teatrin “A.Z. Çajupi” të Korçës, më 1954, dhe punoi aty deri sa doli në pension.
Qysh në fillim të karrieres së tij artistike luajti role kryesore, si ai i Dhimitrit në dramën “Lulja e kujtimit” e Foqion Postolit. Realizoi mbi 85 role, të shumtët tipa e karaktere dramatike të ardhura nga shtresat fshatare, figura njerëzisah të fortë që përfaqësonin idealet rilindase e atdhetare, personazhe që rëndom gjendeshin në udhëkryqe ekzistenciale, me brenga e përvuajtje, të trajtuara me tonime të ulëta e të buta të zërit, me heshtje meditative, me qëndrime e gjeste të ngadalta, por të prera e të vendosura.
Ne rrafshe të tilla aktoriale, gjithmonë me kahe të thuketa psikologjike, janë interpretuar edhe rolet e Batos te drama “Djemtë e Bato Gorës”, e Xhelos te drama “Maro Mokra”, e Delos te drama “Përballë vetes” të Ruzhdi Pulahës etj. Me rolin e Zekos në dramën “Zeko Shkoza” të R. Pulahës iu dha çmimi “Aleksandër Moisiu” si “Aktori më i mirë” në Festivalin e Teatrove, në vitin 1986. Me jetësimin e ndjerë artistik që i bëri asaj figure, ai vijoi me ngulm në hullitë e veta aktoriale duke ravijëzuar tipin e një njeriu me karakter të fortë e burrëror, që vendos e jep drejtësi edhe në rastin kur preken thellë ndjenjat vetjake si prind.
Thimi Filipi u bë një nga aktorët e kërkuar edhe në kinematografi, ku interpretoi në rreth 30 filma. E nisi me filmin e parë shqiptar, “Tana”, më 1958 duke krijuar më pas një hapësirë të vetën, me ravijëzime karakteresh të ndryshëm si burra atdhetarë, fshatarë të ndershëm, njerëz në udhëkryq, por që dinë të zgjedhin kahun e mbarë etj., si në filmat “Gunat përmbi tela”, 1977 (kapedani); “Njeriu me top”, 1977 (Fahredini); “Përballimi”, 1978 (Neziri), me të cilin ka fituar çmim; “Dollia e dasmës sime”, 1978 (Xhezua); “Nusja dhe shtetrrethimi” (karrocieri); “Ballë për ballë”, 1979 (Xhemal Struga); “Mysafiri”, 1979 (Akrepi); “Apasionata”, 1983 (babai i Mirës); “Kush vdes në këmbë”, 1984 (farëmbjellësi); “Rrethi i kujtesës”, 1987 (Loro) etj. Mban titullin “Artist i merituar”.
