Aktorja franceze Patricia Millardet ka ndërruar jetë krejt paparitur në moshën 63 vjeçare .Francezja ishte e njohur për shqiptarët si Silvia Conti, personazh i filmit “Oktapodi” me komisar Corrado Cattani-n i interpretuar nga Michele Placido.
Aktorja ka pësuar një sulm në zemër në spitalin San Camillo në Romë.
Ajo lindi në vitin 1957 në Mont-de-Marsan, në rajonin e Neë Aquitaine.
Roli i magjistrates kurajoze dhe të pakorruptueshme të Silvia Contit në filmin “Oktapodi”, e bëri atë shumë të njohur për publikun e gjerë.
Një rol që i kishte dhënë asaj popullaritet të madh kudo.
Ajo ishte betuar se do të hakmerrej për vdekjen e komisarit, heroi i historisë në film, i vrarë nga mafia.
Por që nga ai moment heroina ishte bërë vetë ajo, shkruan “Repubblica“.
“Pse ky sukses i madh? Vërtet nuk e di”, shpjegonte ajo në një intervistë për La Repubblica.
“Mendoj se Silvia i pëlqente publikut sepse ishte shumë moraliste, e pastër dhe e disponueshme. Në fillim ky rol më fuste frikën, isha nervoze.
Më pas shkoi mirë. Për ta bërë të mirë një personazh duhet ta besosh thellësisht dhe të mendosh e të sillesh si ajo.
Jam dëfryer duke e interpretuar. Rulli dhe Petraglia, skenaristët, kishin shkruar një rol perfekt. Vetëm në një pikë nuk ramë dakord.
Silvia nuk mund të dashurohej Licata-n. Ishte një moment kur ajo duhej të shkonte të takonte Davide-n. U rebelova.
Si mund të sillej ashtu një grua që kishte humbur dashurinë e jetës së saj në një mënyrë aq të dhunshme?”.
Në karrierën e saj kishte recituar në shumë produksione kinematografike dhe televizive. Debutoi në kinemanë italiane në vitin 1987, në një të film të Carlo Lizzani “Assicurazione sulla morte”.
Ndërsa në vitin 1990 aktroi në “Il sole anche di notte” i Paolo dhe Vittorio Taviani.
Popullariteti i madh erdhi me serinë “La Piovra” (Oktapodi) në Rai 1.
Aq i madh ishte popullariteti i saj, sidomos në vendin tonë, saqë Sali Berisha e përmendte edhe në Parlament kur Ina Rama merrte postin e kryeprokurores.
Berisha e quajti atë “Silvia Conti” shqiptare, por më pas ndërroi mendje natyrisht.
