Rudina Hajdari është larguar nga mbledhja e Këshillit Politik e revoltuar. Deputetja demokrate ka thënë se nuk mund të qendronte në një mbledhje, ku nuk diskutohej reforma zgjedhore, por se kush do të marrë tenderin për identifikimin biometrik të votuesve.
Në media është përfolur për një marrëveshje të dytë mes Bashës dhe Ramës, që tenderin ta marrë pikërisht një njeri i Bashës. Dhe nuk bëhet fjalë për pak, por për disa dhjetëra milionë euro.
“Është e pamundur të flitet për një gjë që është normale dhe që ka të bëjë me ndryshimet që duan shqiptarët në këtë tryezë.
Qytetarët sot presin më shumë nga ne dhe nuk presin që të diskutojmë se kush do ta marrë tenderin e identifikimit biometrik.
U largova dhe kam gjëra shumë më të mira për të bërë dhe jo të merrem me këta anëtarë të Këshillit Politik.
Ne folëm për ato pika që kanë të bëjnë me marrëveshjen. Kam një synim, që është ndryshimi i sistemit dhe nuk mund të rri në një Këshill ku merren me gjëra që nuk kanë rëndësi fare për qytetarët. Nëse do të vazhdojmë më këtë metodë, po i mbyllim derën njerëzve që kanë sado pak besim tek kjo reformë.
Beteja do të jetë në Parlament dhe nuk duhet të merremi pas dyerve me tendera.
Mundohen që te fusin në ligj mënyrën e tenderimit, merren si do e bëjmë negocimin, me shpallje apo pa shpallje?!
Unë nuk pres nga kjo tryezë këtë. Sa herë të flitet për tendera, unë nuk marrë pjesë në mbledhje”, tha Hajdari.
