Mehran Karimi Nasseri është iraniani që jetoi për 18 vjet në aeroportin Charles de Gaulle të Parisit dhe frymëzoi filmin e Steven Spielberg të vitit 2004 “The Terminal”.
Ai vdiq në vitin 2022 nga një atak kardiak në terminalin 2F të aeroportit rreth mesditës, sipas një zyrtari të autoritetit të aeroportit të Parisit.
Karimi Nasseri, i cili pretendonte se ishte britanik, por besohet se kishte lindur në vitin 1945 në provincën iraniane të Khuzestanit, jetoi në Terminalin 1 të aeroportit nga viti 1988 deri në vitin 2006, fillimisht në ngërç ligjor sepse i mungonin letrat e qëndrimit dhe më vonë sepse e zgjodhi vetë.
Pasi kaloi ca kohë në një spital për një ndërhyrje, më pas në një hotel afër aeroportit të paguar me paratë që kishte siguruar nga të drejtat e filmit dhe më pas në një strehë për njerëzit e pastrehë, ai u rikthye të jetonte sërish në aeroport javët e tij të fundit.
Saga e tij frymëzoi një film francez të vitit 1993 dhe një opera të kompozitorit Jonathan Dove, si dhe filmin “The Terminal” të Spielberg, me aktorë Tom Hanks dhe Catherine Zeta-Jones.
Megjithëse kompania e produksionit të regjisorit thuhet se i ka paguar Nasserit një tarifë për të drejtat e historisë së tij, ai nuk përmendet në film apo në ndonjë material zyrtar publicitar.
Një autobiografi, e shkruar nga autori britanik Andreë Donkin, u botua në vitin 2004.
Sipas rrëfimit zyrtar të jetës së tij që ai vetë do ta kundërshtonte më vonë, Nasseri lindi në jugun e pasur me naftë të Iranit si një nga gjashtë fëmijët, nga një baba mjek që punonte për kompaninë anglo-iraniane të naftës.
Në moshën 23-vjeçare, pak pasi babai i tij vdiq nga kanceri, nëna e tij i tregoi se ajo nuk ishte nëna e tij e vërtetë dhe se ai ishte fryti i një lidhjeje midis babait të tij dhe një infermiereje skoceze.
I dërguar në Britani, ai ndoqi për tre vjet një program për studime jugosllave në Universitetin e Bradfordit dhe u përfshi në një protestë kundër Shahut, e cila u paraqit si arsye për heqjen e pasaportës së tij kur u kthye në Teheran.
Pasi fitoi statusin e refugjatit nga Belgjika në vitin 1981, ai u përpoq të udhëtonte për në Britani për të gjetur nënën e tij të vërtetë, për të cilën ai besonte se banonte në Glasgow.
Ai hodhi letrat e tij të identifikimit në bordin e një anijeje me destinacion Anglinë i bindur se nuk do t’i duheshin më, por më vonë përfundoi në një situatë pa shtetësi.
