Përfaqësuesit ndërkombëtarë të angazhuar dhe investuar në realizimin e reformës zgjedhore në Shqipëri kanë dalë në kor këtë të hënë, duke i kërkuar palëve në tryezën e Këshillit Politik që të gjejnë një marrëveshje dhe të përmbushin njërin prej kushteve të vendosura për hapjen e negociatave me Bashkimin Europian.
Më e ashpër dhe më e drejtpërdrejtë në qëndrim ishte ambasada e Shteteve të Bashkuara të Amerikës në Tiranë, e cila nxit palët të gjejnë konsensus për reformën zgjedhore pa kushte shtesë dhe qëndrime të pazbatueshme. Por menjëherë pas deklaratës së ambasadores Yuri Kim, ka reaguar edhe Lëvizja Socialiste për Integrim. Ka qenë nënkryetari i LSI, Petrit Vasili, i cili përmes një postimi në rrjetet sociale deklaroi dje se opozita ka zero kushte të reja për këtë reformë.
Sipas Vasilit, fajtore për shkatërrimin e zgjedhjeve është vetëm mazhoranca që duhet të heqë dorë menjëherë nga shkatërrimi i reformës zgjedhore. “Zero kushte të reja nga opozita e bashkuar për reformën zgjedhore. Kushte të reja bllokuese të konsensusit nga hajdutët e zgjedhjeve të Dibrës, të zgjedhjeve 2017 dhe votimeve moniste të 2019, për të legjitimuar vjedhjen e votave. Identifikimi biometrik dhe administrimi i zgjedhjeve që garanton votën e lirë nga vjedhjet janë aty prej javësh.
Asnjë lëshim nuk do t’i bëhet grabitjes së votave. Rilindja kërkon të mbushë kutitë, të numërojë vetë dhe të nxjerrë po vetë rezultatin. Fajtore për shkatërrimin e zgjedhjeve është vetëm rilindja që duhet të heqë dorë menjëherë nga shkatërrimi i reformës zgjedhore”, deklaroi Vasili. Nga ana tjetër, sekretari i Partisë Demokratike për Çështjet Zgjedhore, Ivi Kaso, deklaroi dje gjatë një prononcimi për mediat se nuk ka asnjë kusht apo kërkesë të re nga opozita për reformën zgjedhore.
Sipas tij, opozita i ka bërë të qarta propozimet dhe qëndrimet e saj që në fillim të procesit dhe tani është mazhoranca që po tërhiqet. “I sfidoj publikisht të vijnë këtu e të na sqarojnë çfarë kuptojnë me propozime të reja. Sqaroj se ka zero kushte të reja nga opozita në tryezë. Problematikat që ka ngritur opozita kanë qenë aty që në fillim. Për sa i përket parimeve, kërkesave, opozita s’ka çeduar asnjëherë dhe ka bërë zero kërkesa të reja në tryezën e dialogut.
Për të hir të konsensusit kemi dhënë dakordësi për një sërë paketash të lidhura me njëra-tjetrën. Për identifikimin biometrik mazhoranca dha dakordësi dhe u tërhoq në fund. Opozita nuk kërkon garanci të tjera, gjëra për veten e vet, por gjërat që Kodi Zgjedhor i ofron, të mos çedojnë”, deklaroi Kaso.
