Kryeministri Edi Ram ka paralajmëruar dje shkrirjen e Lëvizjes Socialiste për Integrim. Në korridoret e politikës është folur shpesh këto ditë se reforma zgjedhore ka pasur si plan pikërisht fundosjen e LSI, por kryeministri Edi Rama e deklaroi hapur dje se më 25 prill partia e presidentit do të marrë tatëpjetën.
Meta ka hequr xhaketën e presidentit dhe tashmë ka nisur fushatën krah partisë së tij. Presidenti po bën takime në qytete dhe çdo ditë gjen nga një kauzë për të sulmuar qeverinë. Dje Rama vendosi të reagojë për sjelljet e kreut të shtetit, duke mos kursyer asgjë. Në 2 korrik Meta publikoi një SMS që Rama ja kishte dërguar që në shkurt, ku e paralajmëronte se nëse digjen mandatet LSI-së nuk do i gjejë nam e nishan.
Dje Rama dha sinjalet se po e mban fjalën. Në një konferencë shtypi për të prezantuar platformën e PS për vlerësimin e deputetëve, Rama tha se qëndrimet e Presidentit janë turpëruese, ndërsa u shpreh se është hedhur në sulm për të shpëtuar partinë nga shkrirja. “Më vjen shumë keq, po është fakt, Ilir Meta është zhveshur plotësisht nga roli presidentit tanimë edhe një herë tjetër dhe është zhytur i gjithi në një fushatë politike për të shpëtuar nga falimentimi sh.p.k-në, siç e ka përcaktuar Lulzim Basha, të Monikës dhe të tribusë së tij.
Mos prisni asgjë tjetër nga Ilir Meta, të paktën deri më 25 prill, përveç përshkallëzimit të vazhdueshëm të një retorike që na turpëron të gjithëve ne si qytetarë të këtij vendi, që vjen nga goja e Presidentit të Republikës tonë. Nuk duhet të çudisë asnjërin prej nesh, sepse Ilir Meta është thjesht kryetari i shtabit elektoral të opozitës, që përdor për këtë zyrën e Presidentit të Republikës”, tha Rama dje.
Disfata e LSI
Rama u ndal dhe te reforma zgjedhore, duke dhënë sinjale se përmes kësaj reformë LSI do të kapitullojë. Shefi i qeverisë deklaroi para gazetarëve se ata që i tremben reformës apo zgjedhjeve dihen. Rama u shpreh se mjafton të shohësh reagimet në publik dhe më i tremburi është presidenti. Sipas tij, ai e di që në 25 prill LSI do të marrë një rezultat negativ si kurrë më parë.
“Kompromiset janë gjithmonë mbi parimin që të gjithë të mërziten nga pak, nuk janë që të gjithë të dalin të lumtur. Kush është mërzitur më shumë, natyrisht është mërzitur më shumë kush do humbë zgjedhjet. Nivelin e mërzisë shikojeni nga deklaratat. Më i mërzituri nga të gjithë është Ilir Meta, sepse do të humbë zgjedhjet dhe do t’i humbë zgjedhjet në mënyrë shembullore këtë radhë, siç e meriton në fakt, sepse Shqipëria, Ilir Metës nuk i ka asnjë borxh”, tha Rama. Më tej ai i përmendi postet që ka mbajtur Meta, duke deklaruar se presidenti kërkon vetëm të nxisë sherr dhe tension politik.
Sipas Ramës, ai duhet të qëndrojë mbi palët. “Të gjithë ne i kemi borxhe Shqipërisë, të gjithë ne. Ilir Meta është borxhliu më i madh ndaj Shqipërisë, sepse Shqipëria si askënd tjetër në historinë e vet e ka bërë kryeministër, e ka bërë kryeparlamentar e ka bërë president. Çfarë do më shumë ky njeri që nuk rri rehat një sekondë të vetme dhe vetëm mendon si të nxisë dasi, sherr, rrëmujë, për të përfituar si “i treti i vërteti”!
Edhe vetë pozicioni ku qëndron është një pozicion i zgjedhur për të qenë i treti i vërteti, që nga dua unë shkon rrota e historisë, prandaj me mua, ose ikni në opozitë, ama me mua në pushtet për hesapet e mia”, tha më tej shefi i qeverisë. Ai u shpreh se presidenti dhe PD-LSI e dinë që do i humbasin zgjedhjet./ Kliti Topalli
