Vladimir Putin ka bërë një kërcënim serioz ndaj Islandës, për shkak të organizimit të disa fluturimeve ku do të transportoheshin ndihma ushtarake drejt Ukrainës nga Reykjavik-u.
Asgjë e habitshme deri këtu, po të mos ishte për faktin se pjesë e këtyre dërgesave, është edhe Shqipëria!
Ndër 13 vendet e përfshira në organizimin e këtyre fluturimeve në bashkëpunim me Qeverinë dhe Ushtrinë e Islandës, gjendet e përfshirë edhe Tirana zyrtare me dërgesat e saj në ndihmë të Kievit.
Lajmi është i konfirmuar nga disa media ndërkombëtare – përfshi ato ukrainase, përcjell Albanian Post.
Në bazë të kërcënimit që ka ardhur nga Moska drejt Islandës, avionët që marrin pjesë në operacione të tilla, do të cilësohen si “shënjestra” nga forcat ruse.
Në tërësi, bëhet fjalë se ka pasur 13 fluturime që prej fundit të shkurtit, me armatime nga Shqipëria, Sllovenia, Italia, Kroacia dhe Portugalia.
“Tërheqim vëmendje për faktin se Rusia ka të drejtë të cilësojë dërgesat e armatimeve drejt territorit ukrainas, si përfshirje legjitime ushtarake”, shkruhet në njoftimin për shtyp të Ambasadës së Rusisë në Reykjavik.
Njëkohësisht, aty shkruhet se furnizimi i Kievit me armë nuk do të çojë në rezultatin e kërkuar prej Perëndimit.
Mbi këtë fakt kanë shkruar edhe ekspertë të fushës në mediat e tyre sociale, duke shpjeguar intinerarin e rrugëve ajrore, i cili “bën shumë sens”.
Një prej tyre, Tomi Ahonen, thekson se armatimet shqiptare kanë qenë në përdorim për trajnime në SHBA dhe tashmë mund të kenë fluturuar për në Islandë, me vendmbërritje përfundimtare Ukrainën.
Mbetet për t’u parë nëse diçka të tillë do ta konfirmojnë edhe organet kompetente në Shqipëri.
