Pas presionit të ndërkombëtarëve, Gjykata e Lartë pritet të plotësohet edhe me 4 anëtarë. Këshilli i Lartë Gjyqësor ka zhvilluar dje mbledhjen e radhës duke kualifikuar katër emra në listën e gjatë të kandidatëve.
Sipas ligjit, Gjykata e Lartë ka 19 anëtarë, ku 4 janë nga radhët e juristëve, ndërsa pjesa tjetër nga radhët e gjyqtarëve. Momentalisht, Gjykata e Lartë ka vetëm 3 anëtarë nga radhët e juristëve, ndërsa me 4 emrat e radhës që do të emërohen numri do të shkojë në 7.
“Pas verifikimit të kushteve dhe kritereve ligjore të emërimit, pasurisë dhe figurës, Këshilli vendosi kualifikimin për emërim të kandidates së diplomuar në Shkollën e Magjistraturës, znj. Entela Gjoni. Këshilli pas shqyrtimit të kandidaturave për ngritjen në detyrë në Gjykatën e Lartë, vendosi kualifikimin e magjistratëve znj. Margarita Buhali, dhe z. Dhimitër Lara, z. Klodian Kurushi dhe znj.
Albana Boksi si dhe vijimin e procedurave të mëtejshme të emërimit”, thuhet në njoftimin e KLGJ. Ndër të tjera gjatë kësaj mbledhje KLGJ ka kualifikuar 2 anëtarë për në Gjykatën e Posaçme të Apelit, pas këtij vendimi ata fillojnë menjëherë procedurat për emërimin në detyrë.
“Gjithashtu pas shqyrtimit të kushteve dhe kritereve ligjore për ngritjen në detyrë në Gjykatën e Posaçme të Apelit për Korrupsionin dhe Krimin e Organizuar, Këshilli vendosi kualifikimin e magjistrateve znj. Miliana Muça dhe znj. Iliriana Olldashi si dhe vijimin e procedurave të mëtejshme të emërimit”, përcaktohet në njoftim.
Procedimi disiplinor Sakaq ditën e djeshme Këshilli i Lartë Gjyqësor ka zhvilluar mbledhjen për shqyrtimin e kërkesës së ILD për të shkarkuar gjyqtarin Markelian Kuqo të Gjykatën e Korçës, që liroi në mënyrë të dyshimtë Gerd Gjinararin (Gjenerali), i dënuar për vrasjen e të fortit të Tiranës, Arben Grorin në Itali në ‘97-ën. Gjyqtari prezent në këtë mbledhje ka hedhur poshtë të gjitha akuzat e ILD.
Sipas tij, faktet e paraqitura nuk janë mirë të argumentuara dhe kanë tendencë paragjykimi për të. “S’jam dakord me pretendimet e ILD. KLGJ të shqyrtojë problematikën se për çfarë ndodhem. S’kam komunikim zyrtar se pse ndodhem në procedim. Nuk kuptoj arsyet pse nisi hetimi disiplinor ndaj meje. Faktet kishin natyrë paragjykuese, në mungesë të argumentit”, tha gjyqtari Kuqo.
Të hënën mblidhet KED Nga ana tjetër edhe për Gjykatën Kushtetuese vijon puna. Ashtu si për Gjykatën e Lartë, ashtu dhe për Kushtetuesen presioni ndërkombëtar është rritur ndjeshëm. KED në korrik skualifikoi të gjithë emrat, ndërsa të hënën mblidhet për vakancën e tretë të presidentit, për të mos thënë vakanca më e rëndësishme pasi ka disa emra që janë të besuarit e Metës.
“Ditën e hënë, datë 05.10.2020, ora 13:00, thirret mbledhja e radhës e Këshillit të Emërimeve në Drejtësi, me këtë rend dite: 1. Informacion në lidhje me funksionimin efikas dhe efektiv të Këshillit të Emërimeve në Drejtësi. 2. Shqyrtimi i gjetjeve në procedurën e verifikimit për kandidatin për vendin vakant, vakancë e parakohshme në Gjykatën Kushtetuese, e shpallur nga Presidenti i Republikës në datën 22.11.2019; Sergjio Mazreku; Sinan Tafaj; Sonila Bejtja; Shaqir Hasanaj; Zhaklina Peto”, thuhet në njoftim.
