Komisioni parlamentar i Ligjeve ka miratuar ditën e djeshme në parim ndryshimet në Kodin Zgjedhor. Dy nismat e depozituara në Kuvend, një nga grupi parlamentar demokrat dhe një nga mazhoranca janë bashkuar në një të vetëm.
Plani ishte që sot të vijonte diskutimi nen për nen në Komisionin e Ligjeve dhe më pas të enjten të bëhej votimi në seancë plenare. Por pasdite kanë ndryshuar planet e mazhorancës. Sipas burimeve, komisioni nuk do të mblidhet dhe as të enjten nuk do të ketë votim.
PS ka vendosur t’i japë kohë opozitës jashtëparlamentare për të diskutuar draftin e propozuar. Por kjo tërheqje duket se erdhi dhe pas ultimatumit që erdhi nga ambasadorja Yuri Kim, e cila kërkoi konsensus. Nga ana tjetër, ndonëse opozita jashtëparlamentare ka depozituar në Këshillin Politik draftin e saj ku kërkon hapje 100 për qind të listave dhe të mos ndryshojë formulën e koalicioneve, mazhoranca qeverisëse vijon të jetë e vendosur për të mos prekur koalicionet.
Partia Socialiste qysh nga fillimi vijon të shprehet e vendosur për të eliminuar koalicionet parazgjedhore dhe këto të pasqyrohen në Kodin e ri Zgjedhor. Por në Kuvend kishte edhe amendime të tjera që ishin depozituar nga deputetët Ralf Gjoni dhe Andi Përmeti.
Reagime
Ndërkohë që gjatë mbledhjes së Komisionit të Ligjeve përfaqësuesi i PS në Këshillin Politik, Damian Gjiknuri ka shpjeguar me detaje propozimin e PS-së për hapjen e listave si dhe i ka dhënë një përgjigje PD-LSI përse nuk mund të mbahet formula e koalicioneve ashtu siç ka qenë në ligjin e vjetër.
Sipas tij, lejimi i koalicioneve parazgjedhore krijon deformime të mëdha, për arsye se vota nuk ndahet në mënyrë të drejtë. “I kemi duart e lidhura për të mos prishur marrëveshjen e 5 qershorit, të negociuar nga faktorë që na interesojmë që t’i kemi pranë, të paktën të shkohet te minimumi i mosdakordësisë.
Praktika nuk e ndalon lirinë e konkurrimit të përbashkët të disa forcave zgjedhore është lejohet që të krijojnë aleanca. Sistemi i kaluar kishte mbyllur listat dhe kishte hapur partitë, por kjo krijon pabarazi se po të kemi edhe lista të hapura dhe parti të hapur krijohet një deformim i vullnetit të zgjedhësve, se vota i shkon një koalicioni i një partie më të madhe dhe krijon deformim dhe kjo është arsyeja se përse asnjë vend i hapësirës së OSBE-ODIHR që të sjellë një moment të një vendi një model proporcional rajonal me lista të hapura ose të mbyllura që ka formulimin e koalicionit siç e kemi ne.
Asnjë vend nuk e ka”, tha Gjiknuri. E vetmja gjë që mazhoranca është shprehur e gatshme për të negociuar është pragu elektoral. Sipas Gjiknurit, pragu 3 për qind nuk është më i mirë dhe ka lënë një mundësi për konsensus mes palëve. “Nuk ka asnjë impakt sa i përket financimit apo përfaqësimit.
Dhe nga kjo pikëpamje nuk ka asnjë problem koalicioni. Çështja e pragut, edhe kjo është një propozim që në fillim ishte 5%, pastaj u vendos që të përcaktoheshin nga ligjvënësit. 3% quhet një prag normal, i ulët. Në vendet e tjera shkon 4-5%. Kjo reflekton situatën e sotme, u nisëm nga një premisë që të marrësh një përfaqësim duhet të demonstrosh që ke një numër votash”, tha Gjiknuri.
Reagon Murrizi
Ndërsa kreu i grupit parlamentar demokrat, Myslim Murrizi u shpreh nuk do të heqë dorë nga kërkesa për hapje të plotë të listave. Në mbledhjen e Komisionit të Ligjeve, Murrizi tha se një tjetër kërkesë e tyre është që numërimi i votave të bëhet nga njerëz apolitikë.
“Varianti i PS-së është një sondazh dhe jo lista të hapura. Ne në emër të listës sonë kemi kërkuar që listat të hapen 100 për qind. Ne duam që në këtë Kuvend të vijnë deputetë, që vijnë nga qytetarët shqiptarë. Mos pengoni atë që lejon Kushtetuta.
Dëshiroj që për herë të parë të ketë garë të ndershme. Ne kërkojmë që numërim të jetë nga administrata politike. Kemi propozuar edhe pragun. Nuk na tremb pragu. Të vijnë në Parlament ata që e kalojnë pragun. Pra prag kombëtar me sistem rajonal nuk mund të ketë. Idealja do të ishte që të ishte pragu natyral për një mandat në qark”, tha ai. / ELISJEDA KIKO
