Java që sapo ka nisur do të jetë vendimtare për stabilitetin politik. Edhe pse PS dhe PD i hodhën pas mëritë e vjetra dhe gjetën konsensusin për reformën zgjedhore, testi i vërtetë do të jetë këtë javë pasi do të vendoset nëse drafti i 5 qershorit do të miratohet apo do të shkojmë drejt një projekti të ri.
Opozita parlamentare ka vënë si kusht ndryshimin e Kushtetutës me qëllim që të japë votën për draftin e dakordësuar. Nesër do të mblidhte Këshilli i Legjislacionit, i cili do të analizojë draftin në fjalë, ku do të vendosë nëse do të shkohet te lista e hapura dhe për pasojë te heqja e koalicioneve apo jo.
Gazeta ka mësuar se në prapaskenë po qarkullojnë disa skenarë që rrezikojnë draftin e propozuar nga amerikanët. Ai draft më shumë ka krijuar pakënaqësi sesa dakordësi dhe një skenar që ekziston është që ai të rrëzohet në Parlament. Pra drafti do shkojë në komisionin e posaçëm dhe nga aty direkt në seancë plenare ku nevojiten 84 vota. Mazhoranca e ka të lehtë t’i plotësojë numrat, por sipas informacioneve,
PS nuk do të pranojë një draft me vota të trafikuara. Çka do të thotë se drafti mund të bjerë dhe PS-PD lajnë duart duke ja faturuar rrëzimin opozitës parlamentare. Skenari i dytë është që mund të shkohet më dy drafte për votim. Një draft i 5 qershorit dhe drafti tjetër, ai i opozitës parlamentare, i cili mund të pësojë disa ndryshime në Këshillin e Legjislacionit. Pra PS, këtë javë do të hyjë në negociata me deputetët e opozitës parlamentare duke lënë jashtë çdo diskutimi PD dhe LSI. Data 30 qershor do të jetë vendimtare pasi aty do të përcaktohet dhe fati i reformës zgjedhore, pasi nëse nuk pranohen listat e hapura, me gjasë mund të kemi dhe rrëzim të draftit të dakordësuar në rezidencën amerikane.
Heqja e koalicioneve
Opozita parlamentare kërkon lista të hapura, por ka futur dhe një klauzolë që mbështetet nga PS. Aty futet ideja e heqjes së koalicioneve dhe rritja e pragut me 5 për qind, skemë kjo që favorizon vetëm PD dhe PS, por dhe i hap rrugë bashkëqeverisjes mes tyre.
Socialistë kanë dalë hapur deri më tani duke thënë se ka ardhur koha që koalicionet të ikin. Vetë kryeministri në Parlament tregoi si shembull rastin e Lefter Maliqit. Kreu demokrat Basha nuk ka folur për këtë gjë, po ashtu dhe demokratët e tjerë. Burime të gazetës bëjnë me dije se vetë PD e do këtë gjë, pasi i jep avantazh në zgjedhje, sidomos përballë LSI.
Vërtet këto dy forca janë bashkë, por në degë ka një rivalitet të fortë mes tyre. Në 2017, LSI paralajmëronte se do e nxirrte PD forcë të tretë. Nëse kemi lista të hapur dhe heqje koalicionesh, mund të ketë shumë surpriza në Parlament. E sigurt është se LSI do të pësojë shumë rënie dhe nuk do mund të ketë më rolin e “xholit”. Meta dhe Kryemadhi synojnë që vitin që vjen të marrin aq mandate sa të jenë përcaktues në qeverinë e re.
PS dhe PD nuk e duan këtë gjë dhe me heqjen e koalicioneve LSI mund të dalë jashtë loje. Nga ana tjetër, me hapjen e listave krijohet mundësia që të hyjnë persona me influencë në zonat e tyre, jashtë 3 forcave kryesore. Ndërkohë Myslim Murrizi, Rudina Hajdari dhe disa deputetë të tjerë kanë thënë se do dalin me parti të tyret. Të gjitha këto tregojnë se heqja e koalicioneve mund të sjellë një bashkëqeverisje PS-PD. Është folur gjatë për këtë ide. Vetë shefi i qeverisë pak kohë më parë e ngacmoi si çështje ndërsa me heqjen e koalicioneve do të hapet tërësisht rruga që të kemi një bashkëqeverisje mes dy partive./Sot/Kliti Topalli
