Teksa rektori i Universitetit të Tiranës, Mynyr Koni, po fut në kaos universitetin, Ministria e Arsimit ka vendosur të marrë në dorë situatën. Koni ka bllokuar diplomat për qindra studentë, ndërkohë që është në fund të mandatit. Për të parandaluar më tej krizën, dje ministrja Besa Shahini ka njoftuar se më 30 korrik universitetet do shkojnë në zgjedhje. Koni nuk kandidon më çka do të thotë se del jashtë loje.
Ministrja e Arsimit Besa Shahini theksoi gjatë njoftimit se ky vendimi vjen pas takimit të djeshëm me rektorët e universiteteve shtetërore, në të cilin rektorët, sipas saj, shprehën pamundësinë e vazhdimit të udhëheqjes së IAL-ve me mandat të përfunduar. Zgjedhjet sipas ministres janë të mundshme, pasi ka përfunduar gjendja e jashtëzakonshme dhe sigurohet prania e studentëve në korrik, të lehtësuar nga rikthimi i parashikuar i transportit publik.
“Sot zhvillova përsëri një takim me rektorët e IAL-ve publike, të cilët shprehën pamundësinë e vazhdimit të udhëheqjes së IAL-ve me mandat të përfunduar dhe sollën në vëmendje nevojën urgjente për zgjedhje në universitete.
Studentët, sidomos ata të viteve të fundit që diplomohen sivjet, më kanë shprehur gjithashtu shqetësimet e tyre për mungesën e shërbimeve nga ana e IAL-ve për shkak të përfundimit të mandateve të autoriteteve drejtuese. Sipas raportimeve që IAL-të kanë paraqitur për prezencën e studentëve në ambientet e tyre, muaji korrik do të ketë një numër të madh studentësh të pranishëm në provime.
Gjithashtu, me heqjen e kufizimeve të transportit publik, studentët dhe pedagogët mund të udhëtojnë lirisht ditën e zgjedhjeve gjithmonë duke pasur kujdes ruajtjen e distancave fizike dhe pajisjen me mjete mbrojtëse kundër COVID-19”, ka bërë të ditur ministrja Shahini. Më tej në deklaratën e saj ministrja ka theksuar se afati ligjor për gjendjen e jashtëzakonshme në vend ka përfunduar, kësisoj kjo nuk do të krijojë pengesa për zhvillimin e procesit. Shahini ftoi të gjithë studentët të marrin pjesë në procesin e zgjedhjeve. “Javën që lamë pas, përfundoi edhe afati ligjor për gjendjen e jashtëzakonshme në vend.
Por, duke marrë parasysh rritjen e rasteve të infektimeve, është akoma e paqartë se si do të rifillojë puna nëpër IAL në vjeshtë. Kështu që, për arsye të zgjidhjes së shumë çështjeve të shkaktuara si pasojë e përfundimit të mandateve të autoriteteve drejtuese në IAL, me propozim të rektorëve të universiteteve publike shpallim datën e zgjedhjeve në IAL më 30 korrik, 2020”, tha ajo.
