Presidenti i Republikës Ilir Meta pretendon se ia ka dhënën nënshtetësinë futbollistit ganez Winnful Essua Joseph Cobbina pasi ka marrë konfirmim nga “institucionet përkatëse” që nuk paraqiste rrezik për sigurinë kombëtare.
Kërkesa për nënshtetësinë është dorëzuar në presidencë nga klubi I futbollit Tirana me datë 28 shtator 2020 dhe të njëjtën ditë Meta ka firmosur dekretin për nënshtetësinë nr.11747. Po si mundi “institucioni përkatës” të bëjë kontrollet e duhura në 8 orë?
Duke konsideruar që Ministria e Brendshme nuk është përfshirë në këtë procedurë, institucioni i vetëm kompetent në këtë lloj kontrolli është SHISH.
Praktikisht Meta ia shkarkon SHISHI-t përgjegjësinë. Dhe në këtë pikë hapet një kapitull tjetër: ose presidenti gënjen dhe duke shkelur ligjin ka firmosur dekretin për nënshtetësinë e Winnful Essua Joseph Cobbina pa pasur në dorë ende asnjë verifikim mbi sigurinë (që mund të ketë ardhur në vazhdim).
Ose skandali zgjerohet duke prekur edhe SHISH që ka lëshuar çertifikatën e sigurisë pa pasur kohën materiale për të mbledhur asnjë informacion mbi futbollistin, i cili ishte nën hetim në Shqipëri për falsifikim leje qëndrimi.
Duke folur për një qytetar të huaj që jeton në Shqipëri vetëm prej dy vitesh si Cobbina, për të verifikuar nëse një person përbën rrezik për sigurinë kombëtare siç e kërkon ligji mbi nënshtetësinë, SHISH-i ashtu si çdo institucion tjetër i ngarkuar për të kryer këtë lloj verifikimi, duhet të komunikojë me institucionet homologe në vendin e originës të të huajit, në këtë rast në Gana, sepse janë ata që duhet të japin informacionet e para mbi të shkuarën e personit që do të verifikohet.
Pastaj duhet zgjeruar kërkimi në vende të tjera në të cilat personi ka jetuar: përveçse në Gana dhe në Shqipëri, Cobbina ka luajtuar në 2014 edhe për Najran SC në Arabinë Saudite, pra SHISH duhe të kishte mbledhur informacione edhe në institucionet e Riadit.
A është e mundur që ky lloj këmbimi informacioni mes Shqipërisë, Ganës dhe Arabisë Saudite të jetë kryer brenda 8 orëve? Padyshim, e pamundur.
Pra skandali zgjerohet: ose presidenti i Republikës gënjen për të fshehur përgjegjësinë e tij në shkeljen e ligjit duke i dhënë nënështetësinë Winnful Essua Joseph Cobbina pa marrë ende asnjë dokument që të çertifikojë sigurinë dhe e ka bërë këtë për të favorizuar presidentin e klubit Tirana që donte të mashtronte UEFA-n?
Ose në skandal është i përfshirë edhe SHISH që dakord me presidentin ka lëshuar një çertifikatë sigurie pa bërë asnjë kontroll.
Një komision hetimor do të shërbente për ta sqaruar edhe këtë.(Shqiptarja.com)
