Gjatë 30 viteve demokraci, në Shqipëri kanë ndodhur me dhjetëra masakra, vrasje dhe skandale që edhe sot janë pa autor. Që nga vjedhja me skemat piramidale, grushti i shtetit më 1998, vjedhja e floririt në Krrabë, vrasja e Azem Hajdarit, zhdukja e Remzi Hoxhës, shfarosja e fisit Haklaj në Tropojë, 21 Janari, Gërdeci, vjedhja e Rrugës Durrës-Kukës, videoja Meta-Prifti, skandali i CEZ, e shumë ngjarje të tjera kanë kaluar në heshtje dhe askush nuk ka mbajtur përgjegjësi.
Por ditët e fundit po jepen sinjale se mund të gjendet drita e zbardhjes për këto. Si për koincidencë, në të gjitha ngjarjet e përmendura më lart, protagonist i drejtpërdrejtë apo indirekt ka qenë Sali Berisha.
Firmat piramidale ndodhën në kohën e tij, grushti i shtetit u orkestrua prej tij. Për vrasjen e Hajdarit ka shumë zëra që thonë se mund të ketë pasur rol. Po ashtu e akuzojnë se ka pasur gisht dhe në zhdukjen e Remzi Hoxhës, apo dhe në shfarosjen e fisit Haklja. Nëse vijmë te skandalet, Rruga Durrës-Kukës u bë kur ai ishte kryeministër, 21 Janari dhe Gërdeci po ashtu. Një ditë para se të jepej vendimi për videon Meta-Prifti, Berisha dhe Meta darkuan bashkë. Skandali i fundit është ai i CEZ, ku sërish dyshohet se ka gisht ai. Si për koincidencë, gjatë muajve të fundit drejtësia po lëviz në këtë aspekt.
Edhe pse dosja e CEZ u mbyll, ajo është apeluar dje dhe pritet të shihet si do ecet. Po ashtu, të martën dolën dëshmi në media për vrasjet në Tropojë ku akuzohet Berisha. Ndërkohë SPAK ka marrë padinë e Izet Haxhsië ndaj Berishës, ku e akuzon për plot 23 ngjarje kriminale në vend. Kjo dosje fjeti te Krimet e Rënda për më shumë se një vit dhe u hap pak para se të ngrihej SPAK. Dyshimet janë se u hap pikërisht që të transferohej te Prokuroria e Posaçme. Haxhia e akuzon Berishën për ngjarjet e mësipërme dhe shumë të tjera. Ai ka qenë truprojë i Berishës dhe pretendon se ka qenë dëshmitar në shumicën e rasteve. Pra duket se po ngushtohet rrethi për ish-kryeministrin Berisha. “21 Janari” dhe “Gërdeci” mund të rihetohen, pasi pritet që familjarët të bëjnë padi në SPAK sapo të ketë nisur mirëfunksionimi. Po ashtu kemi dhe çështje të tjera, që mjafton një padi dhe nisin hetimet.
Padia e Haxhisë
SPAK ka në dorë dosjen më të nxehtë të të gjitha kohërave, Haxhia ka renditur plot 23 krime që kanë tronditur vendin gjatë 30 viteve. Një ngjarje që u rikthye në kujtesë këto ditë është ajo e vrasjeve në Tropojë. Haxhia akuzon Berishën se ka gisht ai në vrasjen e Shkëlqim Haklajt. Këtë gjë e thotë dhe avokati i tij Idajet Beqiri. “Izet Haxhia pohon se zgjedhja e socialistëve për të vënë në krye të Komisariatit të Policisë së Tropojës, Fatmir Haklajn, u prit si “gjëmë” prej Berishës. Ai u bë vërtet si bishë, nga urrejtja, duke e konsideruar si sfidë që po i bëhej atij personalisht. Ishte data 4 janar 1998. Shkëlqim Haklaj kishte vetëm dy ditë që kishte filluar punën si polic në Doganën e Qafë Prushës. Në bazë të urdhrit të Sali Berishës, i cili u rigjallërua me shumë urgjencë prej tij, pikërisht kur Fatmir Haklaj u emërua Shefi i Komisariatit të Policisë Tropojë, ndërsa Shkëlqimi u emërua polic në Qafë Prushë, tre persona të Berishës i zunë pritë në Qafë Luzhë Shkëlqim Haklajt dhe e vranë”, tha avokati.
Por Haxhia ka dhënë deponimet e tij për të gjitha ngjarjet që akuzon Berishën dhe bëhet fjalë për qindra faqe me informacion dhe dhjetëra minuta regjistrim. Të gjithë fashikujt janë te Prokuroria e Posaçme. Janë 23 vepra penale për të cilat pretendon Haxhia dhe duket se kjo padi e tij do të jetë test për SPAK. /Sot/KLITI TOPALLI
