Nejmar Junior dëshiron Barcelonën me çdo kusht dhe për këtë ka refuzuar një ofertë stratosferike për rinovimin e kontratës me Paris San Zhermen. Drejtuesit e klubit kryeqytetas i kanë ofruar një pagë prej 100 milionë eurosh në sezon, për të rinovuar deri në verën e 2025-ës, por përgjigja e yllit brazilian ka qenë një jo e prerë.
Aktualisht Nejmar përfiton një pagë prej rreth 50 milionë eurosh në vit, të ndarë mes PSG-së dhe bankës së Katarit, që e ka zgjedhur si njeri imazh të spoteve publicitare, ndërsa Al Khelaifi i ka ofruar dyfishin për rinovimin. Megjithatë braziliani është nostalgjik për periudhën që ka kaluar te Barcelona dhe kërkon rikthimin që këtë verë në “Camp Nou”, ndonëse e ka të qartë që katalanët nuk do t’i ofrojnë më shumë se 20 milionë euro pagë vjetore.
Megjithatë për të marrë brazilianin, Barcelona do të duhet të derdhë një shifër prej rreth 180 milionë eurosh në arkat e Paris San Zhermen, shifër kjo shumë e lartë për spanjollët, sidomos tani pas krizës që ka shkaktuar pandemia globale Covid-19. Pikërisht për këtë arsyem, drejtuesit e Barcelonës pritet të ulen me Leonardon për të studiuar një formulë transferimi ku të përfshihen disa lojtarë katalanë, mes të cilëve emra si Dembele apo Griezman, që pëlqehen shumë në Paris. Ndërkohë, ish-presidenti i Barcelonës, Sandro Rosell, duke folur për Nejmarin, kujtoi se blerja e tij shumë vite më parë i kushtoi rëndë, pasi bëri shumë armiq.
Sandro Rosell është një nga presidentët më problematikë në historinë e Barcelonës. Ai u emërua numri 1 i Barçës në vitin 2010 kur mposhti në zgjedhje Joan Laportan. Në mandatin e tij që zgjati deri në vitin 2014, Rosell solli në Barcelonë një yll të futbollit botëror si Nejmar Jr të cilin e bleu nga Santosi. Me Rosell si president Barcelona fitoi 9 trofe, por më pas jeta e tij u kthye në një ferr të vërtetë pasi erdhën akuzat për pastrim parash dhe aktivitet kriminal për të cilat iu desh të kryente dy vite burg. 56-vjeçari ka folur rreth situatës së ditëve të vështira për “La Sexta”, teksa tregon detaje nga jeta në izolim. Ai fitoi garën e fortë dhe bleu Nejmar në vitin 2013, veprim i cili i krijoi shumë armiq dhe probleme pafund.
“Kam ndjerë mllef, por jo shumë. Nëna ime ma përsëriste gjithmonë që nuk fiton gjë prej mërisë. Por e kam ndjerë, edhe pse mësohesh me qëndrimin në burg. Nuk më pëlqente të qëndroja në radhë për ndonjë shërbim, por mësohesh. Qëndrimi në burg është një kurë e mirë në lidhje me përulësinë. Më ka ndihmuar fakti që kam qenë presidenti i Barcelonës, më thërrisnin ‘El Presi’. Bisedonim shumë për futboll aty. Kundër meje nuk ishte një gabim gjyqësor, ishte një komplot. Nejmar? Ne nuk kemi bërë asgjë të gabuar, varet nga interpretimi. Blerja e tij më solli shumë armiq. Fjala armik është i fortë, por ishte shumë më tepër sesa një rivalitet”, përfundon Rosell. /NGA ADRIATIK BALLA
