Arjan Drekaj, një 42-vjeçar shqiptar, i akuzuar si bashkëpunëtor në vrasjen e bashkatdhetarit të tij Besnik Metaj, ka vendosur që të kërkojë gjykim të shkurtuar. Trupi i 39-vjeçarit Metaj, i cili jetonte në Treviso të Italisë fqinje, u gjet i varrosur në Cornizzolo më 2 Prill të 2017-s.
Ai ishte ekzekutuar me 3 plumba pistolete në kokë. Autor i dyshuar i këtij ekzekutimi është një tjetër shqiptar, 45-vjeçari Edmond Çomo, ndaj të cilit vijon procesi gjyqësor në Gjykatën e Como-s.
Teksa doli të mërkurën para gjykatës, Drekaj deklaroi se mbrëmjen e 5 Marsit kur Besnik Metaj u zhduk, thjeshtë e kishte shoqëruar atë deri në një parkim pranë shtëpisë së Çomos. Më pas nuk kishte dëgjuar më asgjë për të, për muaj me radhë, derisa në Shqipëri iu ishte afruar dikush, i cili nën kërcënimin e armës e kishte urdhëruar që të mos fliste për vrasjen, në rast se e thërrisnin për ta marrë pyetje.
Kjo e kishte detyruar që të largohej nëpër Europë, fillimisht në Finlandë, më pas në Paris, derisa u arrestua në Gjermani për t’u ekstraduar drejt Italisë. Drekaj po ashtu ka konfirmuar se Çomo kishte një borxh që lidhej me drogën me viktimën.
Besnik Metaj u gjet i groposur në malin Cornizzolo pranë liqenit të Comos, tërësisht nudo. Zbulimi i trupit të pajetë të shqiptarit u zbulua aksidentalisht gjatë një pastrimi rutinë të pyjeve. Identifikimi i tij mundi të realizohej nëpërmjet gjurmëve të gishtave, pasi Metaj kishte disa precedentë penalë për lëndë narkotike dhe çështje të tjera kriminale.
Rreth 3 vjet pas zbulimit të trupit, autoritetet italiane arritën të zbardhnin ngjarjen duke arrestuar autorin e dyshuar të vrasjes dhe motivin, që lidhej pikërisht me një borxh të pashlyer në lidhje me trafikun e drogës.
