Juristi Romeo Kara i ftuar në një intervistë televizive për të folur në lidhje me arrestimin e ish-ministrit Lefter Koka ka deklaruar se ky ishte vetëm fillimi dhe se lidhur me këtë aferë do të kishte më shumë arrestime.
Kara tha se të përfshirë ishin edhe disa kompani ndërsa sa i përket kryeministrit, tha se së paku duhet që të mbajë përgjegjësi morale dhe më pas edhe institucionale pasi Koka ka qenë ministër gjatë kabinetit të tij qeverisës.
Vënia në pranga e Lefter Kokës, ka filluar SPAK të lëvizë seriozisht me këtë arrestim?
Kara: Tani arrestimi është serioz, shtysat apo qëllimet nuk i di, mbetet të shikojmë në vijim, por i qëndroj mendimit tim se ky vendim është i vonuar. Drejtësia duhet të lëvizë sa më shpejt duke u përgjigjur ndaj situatave. Kur them që është i vonuar është se janë përfolur prej më shumë se 4 vitesh dhe nuk janë vetëm pushtetarë apo ish pushtetarë të përfshirë.
Duhet të çohen në skaner të gjithë aktorët të cilët janë përfshirë në firmosjen e kësaj marrëveshje.
Përse u zgjodh Koka për t’u bërë “kokë turku”?
Kara: Në kohën që Koka është fajtor këtu është fajtor si ministër dhe është goditur nga vetë LSI edhe pse ka qenë në grupimin e tyre. Kjo është edhe një luftë politike. Pra duhet parë nëse është një nismë e nisur vetëm për momentin apo me qëllime më të gjata.
Unë nuk kam besim tek ata që e kanë propozuar, jam në dijeni se edhe faktori ndërkombëtar ka qenë në dijeni të kësaj afere edhe për përgjime të ndryshme dhe kanë shfaqur pakënaqësitë e tyre në lidhje me inaktivitetin nga ana e SPAK.
A po përdoret për të fshehur majën e ajsbergut që të çon tek ministrat e tjerë e deri tek kryeministri?
Kara: Besoj se sado të mundohen ta mbajnë nën kontroll këtë çështje, nuk do e arrijnë. Do presim dhe do dalë e vërteta.
Kryeministri u mbrojt me shprehjen se ky kishte qenë një vendim individual dhe qeveria nuk përgjigjet
I jap 50% të drejtë. Individuale është, por moralisht kryeministri duhet të përgjigjet për stafin e tij dhe në këtë rast minimum tregohet se nuk kanë funksionuar mekanizmat supervizues. Problemi është i tillë që qeveritë e suksesshme i lejojnë strukturat që nesër qeveria të mos ketë problem të tilla. Ne nuk i kemi këto struktura që të raportojnë tek kryeministri.
Mendoni se do i shkohet deri në fund kësaj?
Kara: Patjetër do I shkohet deri në fund, nuk është as aktori kryesor dhe as i vetëm në këtë çështje. Numri i personave do jetë më i madh se janë edhe disa kompani të cilat nuk arrijnë dot ta fshehin këtë aferë.
