Ish-kryeministri i Kosovës, Ramush Haradinaj, ka folur sot për situatën e koronavirus itnë Kosovë. Në një lidhje direkte me emisionin “Vizioni i Pasdites”, Haradinaj është ndalur edhe tek marrëdhënia që ka me kryeministrin Edi Rama. I pyetur nëse ka komunikuar me të dhe si i ka parë zhvillimet në Shqipëri, Haradinaj u shpreh se prej kohësh nuk flet me të.
“Me thënë të drejtën kam një ndërprerje në komunikim, ka një kohë të gjatë, prej rrethanave të tjera. Nuk kam arritur me e rikthy.
Jam interesuar për gjendjen përmes plot kanaleve, në raste të caktuara komunikoj me presidentin Meta por dhe me shumë të tjerë. Tani duhet të shpreh respekt për të gjitha ato masa. Bëhet fjalë për ruajtjen e jetës së njerzve.
Me siguri ka vend për kritika dhe për t’u bërë më mirë por duhet shprehur respekt sepse kërkohet edhe disiplinë. Ne kemi një rregull të papajtueshmëri poltike të gjithë ndër vete, edhe unë i kam në raste të caktuara me zyrtarë të caktuar.
Por është kohë që duhet të jemi bashkë, vërtetë duhet ta kalojmë këtë situatë bashkë”, u shpreh kreu i AAK-së.
Haradinaj vijoi më tej duke komentuar edhe kapacitetet e dy vendeve në përballimin e kësaj situate duke u shprehur se pas fatkeqësisë së tërmetit duhet të kishim mësuar të vepronim më shpejt dhe më pranë njëri- tjetrit.
“Ne si shqiptarë kemi pasur tërmetin në Shqipëri dhe tani prapë kemi pandeminë. Kjo duhet të na kishte ndihmuar ne me i rrit kapacitetet tona vepruese në raste fatkeqësie në vështirësi të caktuara.
Ne duhet me qenë një përkujtues i fundit për ne si shqiptar, po flas ne si popuj si vende me bë kujdes me i rrit këto kapacitete. E ka shprehje populli po më zure pa përgatitur fale, herën e dytë jo.
Kosova dhe Shqipëria duhet t’i kenë kapacitetet e veta me u përball me fatkeqësi natyrore si rasti i tërmetit, vërshime, zjarr, epidemi ose pandemi siç ndodhi ky rasti i fundit. Mund të ketë edhe fatkeqësi të natyrave të tjera ne duhet me u përgatit dhe me qenë të aftë. Ja kemi borxh jetës sonë,fëmijëve tanë”, përfundoi Haradinaj.
