Deputetja afgane Farzana Kochai, ka folur për Reuters ku ka treguar dy skenarët që priten të vihen në zbatim në Afganistan.
I pari është ai që lejon gratë të punojnë dhe të shkojnë në shkolla, por me disa kufizime të vogla, të cilin ata janë të gatshëm ta pranojnë.
Mirëpo i dyti, i cili parashikon kufizime ekstrem si moslejimi i vazhdimit të shkollës përtej një moshe të caktuar apo ndalimi i grave të moshës së mesme për të punuar, nuk është i pranueshëm për ta dhe do të ketë rezistencë.
“Si një deputete, si një femër dhe si dikush që vjen nga aktivizimi i shoqërisë civile dhe të drejtave njerëzore, të drejtave të grave. Fakti që vij nga ky formim kulturor, sigurisht që kam frikë për veten , jetën time dhe lirinë për të punuar dhe për të shprehur mendimin tim lirshëm.
Nëse do të na lejojnë t’i bëjmë këto gjëra, pra mos të na pengojnë të shkojmë në shkolla, universitete dhe të gjejmë një vend pune, por të na vendosin vetëm disa kufizime është gjë e mirë.
Ndërsa skenari i dytë është ai që i heq gratë e moshave të mesme tërësisht nga shoqëria, duke i lënë në shtëpi dhe duke i thënë kjo mjafton për ju. Ose nëse thonë do të shkosh në shkollë deri në këtë klasë ose në këtë moshë. Ky është skenari që gratë në Afganistan nuk e tolerojnë.
Nuk mund të bëjmë një marrëveshje të mirë me Talibanët në këtë mënyrë. Nëse Talibanët nuk ja dalin të kënaqin popullin e Afganistanit paksa, atëherë do të kemi rezistencë. Është e vështirë të rritesh me flamurin e vendit tënd, me të gjitha vlerat ku ti beson, dhe një ditë shfaqet dikush që do të t’i marrë”, tha ajo.
Disa ditë më parë talibanët morën Kabulin më shpejt sesa ishte parashikuar, pasi kishin arritur më parë një marrëveshje me SHBA-të për tërheqjen e trupave amerikane nga Afganistani dhe lejimin e tyre së bashku me bashkëpunëtorët të largohen. Marrja kaq shpejt në dorë e vendit ka sjellë një krizë në aeroportin e Kabulit, ku shumë njerëz të frikësuar tentojnë të largohen. Talibanët kanë premtuar se nuk do të sillen si në kohën para se të ndërhynte SHBA-ja, kur kishte shumë kufizime ekstreme.
