Nga Rigels Seliman
Pavarësisht ndasive që ka në raste të caktuara me Tiranën zyrtare, kryeministri i kosovar, Albin Kurti duket se ka zbritur me këmbë në tokë dhe ka përqafuar politika e ndjekura nga qeveria “Rama” sa i takon marrëdhënieve ndërkombëtarëve. Teksa ditën e djeshme ndodhej në konferencën e Sigurisë që po mbahet në Munih të Gjermanisë, mes të tjerash në fjalimin e tij, kryeministri Kurti ka përdorur tezën e zv/ministrit të Mbrojtjes, Petro Koçi.
Ky i fundit përmes një statusi të publikuar në rrjetet sociale në 22 tetor të vitit që lamë pas, ka bërë thirrje Serbisë që të kërkoj falje për krimet që ka kryer në Kosovë. Ndërkohë që, me të njëjtën frazë iu është drejtuar edhe zoti Kurti të pranishmëve në këtë konferencës, kur tha se ka ardhur koha që Serbia të çlirohet nga Kosova. “Pothuajse të gjithë prej jush na ndihmuat që 20 vjet më parë Kosova të çlirohet nga Serbia. Tani mendoj e ka ardhur koha që të ndihmohet Serbia për t’u çliruar nga Kosova.
Pra, pas çlirimit të Kosovës nga Serbia, duhet të bëhet çlirimi i Serbisë nga Kosova”, deklaroi kryeministri Kurti. Por në lidhje me këtë deklaratë ka reaguar edhe vetë zv/ministri i Mbrojtjes, Petro Koçi, i cili ka përgëzuar kryeministrin e Kosovës, Albin Kurti për këtë deklaratë, duke theksuar se ndihet mirë që shefi i qeverisë kosovare ka përdor tezën e tij. Ndërkohë, unë po sjell për lexuesit edhe statusin e zotit të Koçi të publikuar në llogarinë e tij në “Facebook” dhe në disa media në 22 tetor të vitit 2019, i cili ka pohuar të njëjtën gjë.
“Vasfie Krasniqi është britma dhe kushtrimi i çlirimit të Kosovës dhe simboli i kurajos në shoqërinë shqiptare për të thënë të vërtetën. Ajo është thirrja ndaj Serbisë që të guxojë të pranoje turpet gjatë përpjekjes për spastrim etnik të Kosovës. Ndërsa Kosova është çliruar prej Serbisë, Serbia nuk është çliruar akoma prej Kosovës. Sot, duke nderuar Vasfie Krasniqin, gruan që mundi skllavërinë e heshtjes dhe dëshmoi pështirësinë e përdhunimeve të serbëve në Kosovë”, shkruante asokohe zv/ministri i Mbrojtjes, Petro Koçi.
Pra, duket qartë që kryeministri kosovar, Albin Kurti ka përdorur tezën e artikuluar nga zv/ministri i Mbrojtjes, Petro Koçi. Thënë ndryshe, edhe pse zoti Kurti tregon se do që të jetë unik dhe i ndryshëm nga qeveria “Rama”, ai vijon të “vjedhë” ide dhe teza të kabinetit qeveritar, sikundër është rasti i sipërpërmendur.
