Juristi Romeo Kara ka shpërthyer dje në sulme dhe akuza të forta në adresë të ish-kryeministrit Sali Berisha.
Ky i fundit dy ditë më parë mori një goditje të fortë dy ditë më parë nga një zëdhënës i Departamentit të Shtetit, i cili deklaroi për “RTSH” se vendimet për shpalljen “non grata” merren vetëm nga DASH dhe ato nuk kanë kufizime në kohë, domethënë nuk ndryshojnë nga një administratë në tjetrën.
Por përmes një statusi në rrjetet sociale, juristi Kara akuzon ish-kryeministrin Berisha si politikan të korruptuar, ndërsa i bëri thirrje SPAK që t’i kërkojë llogari për pasurinë dhe krimet që ka kryer.
“I akuzuar për korrupsion masiv nga DASH, mister “non grata”, përgjatë gjithë karrierës së tij politike, ka iniciuar dhe është angazhuar, në një mori procesesh gjyqësore për shpifje, brenda dhe jashtë vendit, përkundër çdo personi apo institucioni, i cili guxon dhe nxjerr në dritë të vërtetat rreth bëmave të tij dhe familjes së tij.
Janë procese me një kosto shumë të lartë, sidomos ato ndërkombëtare, por që kurrë nuk janë bërë transparente, lidhur me financimin e tyre, i cili në raste të caktuara shkon në qindra-mijëra USD. I akuzuari ndërkombëtarisht për korrupsion masiv, financon pafund procese gjyqësore me paratë e korrupsionit. Ky është realiteti.
I përdor këto procese si mjet shantazhi, presioni dhe frikësimi, me qëllimin e vetëm, të mos thuhen të vërtetat komprometuese kundër tij”, shkruan ai.
Më tej juristi theksoi se Sali Berisha duhet izoluar familjarisht. “Sidoqoftë, faturat e këtyre gjyqeve, do duhet të zbardhen të gjitha dhe të analizohet financimi i tyre, ndërkohë që kësaj familjeje kriminale duhet fillimisht t’i sekuestrohen pasuritë dhe çdo burim financimi.
Përderisa DASH i akuzon për pengmarrje të sistemit të drejtësisë dhe minim të demokracisë, ata duhen përballur sa më shpejt me ligjin. Kjo familje po lejohet që, me paratë që na ka vjedhur ne, të mbrohet nga ne, kur ne kërkojmë transparence dhe drejtësi ndaj saj”, nënvizoi juristi Kara.
