Lëvizja e ish deputetit të LSI për qarkun e Dibrës Përparim Spahiu dhe caktimi nga kryetarja Monika Kryemadhi si drejtues i fushatës në qarkun e Tiranës, duket se ka krijuar një vakuum në qarkun verilindor.
Këtë vakum ka nxituar ta “mbushë” me sa duket presidenti Ilir Meta, i cili ka “pranuar” dorëheqjen e këshilltarit të tij Shemsi Prençi, për ta vënë në dispozicion të LSI për qarkun e Dibrës.
Dhe nuk e ka për herë të parë Meta këtë praktikë. Kështu veproi dhe me këshilltarin e Saigurisë, ishy kreun e SHISH Bahri Shaqiri, i cili dha dorëheqjen për “angazhime të tjera” dhe vetëm pak ditë më vonë është caktuar kandidat për deputet i LSI në qarkun e Durrësit.
Kështu dhe këshilltari Shemsi Prençi ka dhënë dorëheqjen sot nga ky post.
Prençi u emërua këshilltar i Metës për Emergjencat Civile në dhjetor të 2019-ës, ndërsa është larguar nga kjo detyrë për shkak të “angazhimeve të tij të reja në të ardhmen”.
Lajmin e bën me dije vetë kreu i shtetit Ilir Meta, duke thënë se pranoi dorëheqjen dhe i uroi suksese në të ardhmen.
“Këshilltari për Çështjet e Emergjencave Civile, Shemsi Prençi, pasi më informoi si çdo ditë, për situatën e përmbytjeve në mbarë vendin dhe gjendjen e banorëve në zonat e bllokuara nga dëbora, më njoftoi sot dorëheqjen e tij nga kjo detyrë, për shkak të angazhimeve të tij të reja në të ardhmen.
E falenderova për këshillat e vlefshme, përkushtimin, korrektësinë, profesionalizimin dhe ndjenjat atdhetare të dëshmuara prej tij gjatë bashkëpunimit tonë të frytshëm për gati dy vite.
Duke e pranuar dorëheqjen e z.Prençi, i urova suksese për të ardhmen”, deklaron Meta.
Një rast i veçantë kur një këshilltar jep dorëheqjen, dhe titullari i institucionit e bën vetë njoftimin për mediat!
