Dritë mbi punën e UNMIK-ut në Kosovë, gjatë përpilimit të dosjeve për veprimtarinë e UÇK-së në Shqipëri ka hedhur edhe ish-pjesëtari i UÇK-së Dritan Goxhaj. Në një interviste të dhënë për televizionin “Fax News”, ai dha më tepër detaje.
Goxhaj u shpreh se, lideri demokrat dhe Artan Grubi kanë qenë dy personat përkthyes të UNMIK, ndërsa u shpreh se pas funksionit të tyre kanë pasur edhe funksione të tjera. “Lulzim Basha dhe Artan Grubi kanë qenë përkthyes në kuadër të UNMIK-ut, në fillim pranë zyrës së Hagës për krimet e luftës në Kosovë, pastaj kanë kaluar në funksione të tjera përsëri në rolin e përkthyesit ose të rolit të këshilltarit juridik në UNMIK”, u shpreh ai.
Po ashtu Goxhaj theksoi se dosjet janë firmosur vetëm nga Artan Grubi ndërsa lideri demokrat Lulzim Basha gjatë kësaj periudhe ka qenë përkthyes në UNMIK, si shumë përkthyes të tjerë shqiptarë, por emri i tij nuk figuron zyrtarisht në firmosjen e dosjeve.
“Në dosje ekziston vetëm emri i Artan Grubit si përkthyes zyrtar i kësaj dosje, sepse ai ka qenë dhe personi që ka shoqëruar grupin hetimor prej 12 ekspertësh, të përcaktuar nga Gjykata e Hagës, në bazë të raportit të Dick Martyt të votuar nga Këshilli i Europës për të bërë hetime në Republikën e Shqipërisë”, tha ai.
Sipas Dritan Goxhaj, grupi i personave që kanë ardhur për të bërë hetime në Shqipëri janë shoqëruar nga Grubi. “Kur kanë ardhur për të bërë hetime në Shqipëri janë shoqëruar nga Artan Grubi, i cili aktualisht është zëvendëskryeministër i Maqedonisë”, u shpreh ai.
Ndër të tjera ai u shpreh se ka pasur edhe të tjerë shqiptarë që kanë marrë pjesë në atë dosje, ndërsa i vetmi shqiptar që mund të ndërhynte juridikisht në dosje ishte Argita Berisha, e cila mbante rolin e këshilltarit ligjor në UNMIK.
“Ka shqiptarë të tjerë që kanë marrë pjesë në këtë dosje, por i vetmi shqiptar që ka pasur fuqinë juridike për të ndërhyrë në dosje është Argita Berisha. Në rolin e këshilltarit ligjor vetëm ajo ka pasur të drejtë të ndërhyjë në dosje. Roli i përkthyesve si Artan Grubi dhe Lulzim Basha nuk kanë pasur tagër ligjor për të ndërhyrë në dosje, por vetëm të bëjnë përkthime”, u shpreh Goxhaj i cili ngatërron ose nuk e di se për çfarë akuzohet Basha dhe q♪7 nuk ka asnjë lidhje me ndërhyrjet në dosjet hetimore.
