Partia Demokratike dhe Partia Socialiste duket se po ecin në të njëjtën linjë sa i takon çështjes së reformës zgjedhore. Mazhoranca ka dalë me një draft konkret, ku propozon heqjen e koalicioneve parazgjedhore dhe hapjen 100 për qind të listave të kandidatëve.
Por vetë kreu demokrat Lulzim Basha dhe kryeministri Edi Rama deri tani nuk kanë folur mbi këtë çështje, duke ua lënë në dorë ekspertëve që janë në Këshillin Politik. Por nga dita në ditë po shtohen sinjalet se drafti i propozuar nga PS po i kënaq të dyja palët.
Kryeministri Rama gjatë një takimi me koordinatorët e rretheve ditën e hënë i shmangu komentet për reformën zgjedhore, duke deklaruar se kjo është një çështje që iu takon ekspertëve të merren dhe të flasin për këtë. Por në të njëjtën linjë ishte edhe Basha, i cili gjatë një vizite në një fasoneri në Vorë nuk pranoi të fliste për këtë gjë, duke deklaruar për mediat se kjo është në dorë të ekspertëve dhe ata duhet të përgjigjen për çdo gjë.
“Ekspertët tanë do të japin përgjigje për çdo pyetje. Sot jam këtu për të nënvizuar edhe një herë emergjencën para së cilës ndodhemi. Është një emergjencë ekonomike, është një emergjencë shëndetësore, është një emergjencë që prek fëmijët tanë nëpër shkolla, është një emergjencë sociale.
Nuk pret koha, prandaj kemi dalë përpara me një propozim konkret”, tha Basha. Por në korridoret e politikës po flitet se mes palëve është arritur një konsensus nën hije, pasi çështja e koalicioneve u intereson si PS ashtu edhe PD. Deri tani publikisht, palët ende nuk kanë gjetur një dakordësi mes tyre dhe pritet se çfarë do të arrihet sot në Këshillin Politik ku do të diskutohen amendimet që ka dorëzuar PD.
Plani ekonomik i PD
Edhe gjatë ditës së djeshme ku ishte i pranishëm në një fasoneri në Vorë, Basha ka folur vetën për menaxhimin e situatës së COVID-19 nga ana e qeverisë. Për mediat, kreu demokrat tha se vendi është në krizë të thellë e se paratë e taksapaguesve nuk po shkojnë në xhepat e shqiptarëve.
Sipas Bashës, plani ekonomik i prezantuar nga PD nuk është program elektoral, por një plan për të ndihmuar qeverinë për të dalë nga kriza ku ndodhet. “Plani që kemi shpalosur këtë javë, nuk është programi ynë elektoral, siç, nga padija apo nga dashakeqësia janë përpjekur ta shpalosin disa. Është plani për këto 6 muaj, sepse këto 6 muaj janë të fundit për këtë qeveri.
Duam s’duam ne, drejtimin e ka akoma një njeri, i cili në vend që të marrë masa për t’i ardhur në ndihmë njerëzve, vazhdon të bëjë sharlatanin dhe palaçon nëpër ekrane. Me shpresën që duke përdorur propagandën, do të fshehë të vërtetën. Sado të merret me opozitën, sado të merret e të shajë me gjuhë vulgare prej palaçoje, një të vërtetë nuk e mbulon dot: Tavolinat e shqiptarëve janë boshatisur prej vendimmarrjeve të tij të dështuara, të gabuara dhe korruptive.
Xhepat e shqiptarëve janë boshatisur për shkak të çuarjes të të gjitha parave në grushtet e një kaste të vogël oligarkësh dhe sipërmarrja shqiptare po vuan dhe është në kufijtë e ekzistencës”, tha Basha. Sipas kreut demokrat, nuk ka kohë për humbur, pasi gjendja ekonomike e qytetarëve sipas tij është në gjendje të mjerueshme.
“Po kur e rrethon veten me një grusht të korruptuarish dhe luks të shfrenuar, e ke të pamundur të kuptosh se çfarë po ndodh edhe 500 metra larg teje dhe po iu them që në qendër të Tiranës e në periferi të Tiranës sot njerëzit nuk kanë lek madje nuk kanë mundësi as të futen në listat e dyqaneve.
Këtu ka arritur kriza ekonomike në vend, kjo është e vërteta përtej shfaqjeve dhe propagandës së Edi Ramës. Prandaj nuk ka kohë për të humbur”, tha Basha.
