Gjykata e Posaçme e Apelit lë në fuqi vendimin, mjeku Edvin Prifti i pezulluar nga detyra edhe për 3 muaj. Më herët Apeli vendosi që mjeku të ushtrojë profesionin e tij si pedagog, ndërkohë që do ti duhet kohë që të bindë gjykatën për të veshur sërish bluzën e bardhë të mjekut.
Gjatë seancës nëpërmjet avokatit të tij Prifti ka pyetur gjykatën nëse ky vendim nuk i lejon ushtrimin e detyrës vetëm ne shtet apo edhe në privat, ndërsa gjykata nuk ka dhënë një përgjigje ku është shprehur se përgjigjen do e marrë në arsyetimin e vendimit.
Kujtojmë se disa javë më parë me kërkesë të SPAK, Gjykata e Posaçme vendosi në sekuestro 2 llogari bankare të kardiokirurgut Edvin Prifti i vënë nën akuzë për korrupsion dhe pastrim parash.
Konkretisht janë sekuestruar shumat 51.4 milionë lekë dhe 177 mijë euro, ndërsa nga hetimi ka rezultuar ngritja e një skeme të mirëfilltë kriminale që konsistonte në paraqitjen e faturave tatimore fallco me qëllim shmangien nga pagimi i tatimeve.
Kardiokirurgu u vu nën akuzë rastësisht gjatë hetimeve për korrupsionin në gjykatën e Krujës ku nga përgjimet u zbulua edhe një rast korrupsioni në sistemin e shëndetësisë.
