Pas lajmit se kryeministri britanik Boris Xhonson, është përmirësuar, biles është ngritur në këmbë, Fevzo i dërgoi atij një letër mbështetëse :
“I nderuar zoti Xhonson!
Me siguri që njihemi në distancë, pasi kam qenë dy herë tek mbretëresha Elisabetë dhe kemi folur për ju dhe për punën tuaj.
Me siguri mbreterësha u ka vënë në dijeni.
Lajmi se ju jeni ngritur në këmbë, është një sinjal pozitiv.
Qyshkurse ju u sëmurët dhe e bëtë publik lajmin, unë ndoshta jam gazetari i parë në botë që e kam bërë parashikimin tim për këtë situate, dhe e kam bërë të qartë për shikuesit e mi, se Boris Xhonson, ose do të shërohet, ose do të vdesë.
Dhe në fakt, parashikimi im po del, se ju po shëroheni.
Kur mora vesh lajmin se ju u infektuat, u ndjeva dhe vetë i infektuar.
Ishte një ndjesi që vinte nga fakti se dhe princi Çarls ishte infektuar, si dhe një sërë personalitesh ndërkombëtare që unë i kam miq po ashtu.
Atëhere pyeta veten: Si ka mundësi gjithë këta njerëz të famshëm janë infektuar, dhe unë jo?
Por dilemën ma hoqi një shqiptar që jeton në Itali dhe punon në një spital.
Ai më tha nuk ka rëndësi nëse je infektuar vërtet, por a ndjehesh i tillë.
E pra, unë ndjehesha i tillë, vetëm se u infektuat ju.
Ndaj lajmi se po shëroheni më bën shumë optimist.
Do të dëshiroja të shtroja një darkë bamirësie për gjithë personat e famshëm në botë të shëruar nga koronavirusi.
Natyrisht ju dhe princi Çarls, jeni në krye të listës.
Nuk ka rëndësi se çfarë do porosisni, apo ku do hani.
Ne do të bëjmë një lidhje në zoom dhe do të shkruajmë poshtë që “Opinion” financon një drekë për të famshmit në botë të shëruar nga koronavirusi.
Kjo është shumë e rëndësishme të eklipsojmë dhe kryeministrin tonë, i cili vetëm se ka dërguar 30 mjekë në Itali, është bërë i famshëm.
Unë bëj çdo natë emisionin e Bruno Vespës, bile jam gati ta zëvendësoj dhe atë nëse e zë korona, dhe për këtë kam rënë dakord edhe me atë, dhe nuk jam popullor sa Rama në Itali.
Ndaj disa gjëra duhet të filloj t’i përmirësoj.
Shërim të shpejt e shihemi tek darka ime e bamirësisë.”
