Nga Mero Baze
Erion Veliaj ka bërë një gafë të rëndë publike, për të cilën dhe mund të ndëshkohet, nëse nuk e ka vetëm propogandë politike. Ai ka deklaruar në një takim me simpatizantë socialistë, se kunati i Lulzim Bashës ka aplikuar për leje për vilën e tij të “pestë”, siç e quan ai aplikimin për leje të qytetarit Erion Isufaj.
Sipas zotimit të Veliaj, ai nuk ka ndërmend t’i japë leje, pasi sipas tij, ata kanë mohuar katër vilat e tjera dhe flasin e ankohen për varfërinë.
Deklarata e Veliajt nuk është as politikisht korrekte, por mbi të gjitha as ligjërisht korrekte.
Kryetari i Bashkisë së kryeqytetit nuk është Inspektoriati i Lartë i Deklarimit të Pasurisë, që t’u numërojë vilat qytetarëve dhe pastaj të vendosë kujt t’i japë leje e kujt të mos i japë, pasi me këtë kriter këtyre që ndërtojnë pallate dhe kulla në Tiranë, nuk duhet t’u japë leje të dyta, pasi kanë bërë nga një.
Leja është një e drejtë që i buron çdo investitori, nëse ai plotëson kushtet juridike për ta zhvilluar pronën. Në rastin konkret, Erion Isufaj dhe partnerja e tij kanë blerë tokën e tyre dhe kanë aplikuar për leje për ndërtim vile, sipas koefiçentëve që ka lejuar plani urbanistik në atë zonë.
Erion Veliaj nuk ka asnjë të drejtë ta ndalojë kunatin e Lulzim Bashës të ndërtojë dhe zhvillojë pronën e tij. Ndryshe nga në Vlorë, ku babai i tij zaptoi detin dhe bëri ndërtim të paligjshëm duke korruptuar zyrtarë lokalë, këtu ai ka blerë tokë të ligjshme dhe po i kërkon leje të ligjshme Bashkisë.
Debati pastaj se sa vila ka Lulzim Basha dhe kunati i tij, është debat moral, ose objekt i ILKDP, apo SPAK, nëse ata i kanë përfituar të adhurat nga burime të paligjshme.
Por dhe kjo është pa shumë bazë. Sipas bilanceve të Drejtorisë së Tatimeve, kompanitë e kunatit të Lulzim Bashës janë tre nga kompanitë me ritmin më të lartë të rritjes së të ardhurave në Shqipëri këto 7 vitet e pushtetit socialist, kështu që u dalin dhe tepërojnë lekët, jo për pesë vila, por dhe për pesë kulla, nëse u shkon në mendje.
Erion Veliaj nuk është shpërndarës i të mirave material, por menaxher i qytetit, në bazë të planit urbanistik të miratuar, në rastin konkret në investimet në ndërtim.
Ndaj ai duhet të tërhiqet dhe të kërkojë ndjesë nga deklarata që nuk i jep leje Erion Isufajt.
Lejen atij ia jep ligji. Lekët ja kanë dhënë socialistët. Të drejtën për t’i përdorur lekët si të dojë, ja jep vetja.
Askush nuk mund ta ndalë atë dhe Lulzim Bashën të jetojë në vila, përderisa këtë e bëjnë me të ardhura të fituara nën pushtetin socialist, të cilin e quan të korruptuar.
I vetmi problem këtu është problemi moral që Lulzim Basha ka me demokratët, për të cilët ankohet që po vdesin për bukë, kurse ai po vdes të marrë leje për vila.
Por ky nuk është problem i Erion Veliajt, por problem i opozitarëve. Kjo ndoshta i mbush ata me besim se derisa kryetari i tyre ka sukses si biznesmen në opozitë, në pushtet mund të jetë i paparë.
