Policia dhe Dogana e ka shitur si lajm të madh sekuestrimin e një sasie monedhash britanike, rreth 120 mijë paund që u kapën dje në Durrës.
Në mënyrë abuzive, u tha në fillim, se bëhej fjalë për 1 milionë paund, e më pas doli se ishin 120 mijë.
Megjithatë, u bë gjithë ajo bujë, a thua se kemi të bëjmë me një skandal të madh, kur vetë skandali ishte pikërisht abuzimi me këtë ngjarje.
E vërteta e gjithë kësaj pune është vërtetë se bëhej fjalë për një furgon që bën rregullisht rrugën nga Britania e Madhe në Shqipëri e posaçërisht në Shkodër.
Ai sjell përgjithësisht ngarkesa të emigrantëve shqiptarë në Mbretërinë e Bashkuar, dhe kur bën rrugën e kthimit dërgon djathë, byrekë, lakrorë, vaj ulliri, raki, e gjëra të tilla që familjet dërgojnë te fëmijët e tyre emigrantë.
Te furgoni, emigrantët sjellin edhe para kesh për familjet, dhe askush nuk kalon më shumë se 2-5 mijë paund, që i ka grumbulluar për tre ose 6 muaj.
Rruga informale që ata përdorin, është për faktin se janë përgjithësisht pa letra, pra dokumente identiteti, ku e kanë të pamundur të transferojnë para në agjencitë e tilla, që kërkojnë kartë identiteti, por edhe komisionet e dërgimit janë shumë të larta dhe ulin ndjeshëm vlerën e parave që ata i dërgojnë familjeve.
Kaq është e vërteta dhe fsheh brenda një dramë të madhe të familjeve shqiptare, që realisht është drama e përgjithshme e një populli kurbetqar, siç jemi ne.
Është një problem social, që përdor rrugën në cash, edhe për faktin se një pjesë e madhe e emigrantëve tanë pa letra atje, punojnë në te zëzë dhe nuk paguhen nëpërmjet bankës.
Që këto nuk janë para të krimit apo të grupeve të narkotrafikantëve, që punojnë në Angli, mund të vërtetohet fare lehtësisht. Thjesht duke parë macetat e parave, që janë ndarë për familje, kupton se vlera e tyre është e vogël dhe mjafton që të ndiqet rruga se ku do të dërgohen.
Adresa e tyre është publike dhe ka letra nga emigrantët, e mund të verifikohet shumë lehtë. Madje që dje në Policinë e Shkodrës dhe mediat e qytetit, kanë ardhur kërkesa nga familjarët për të tërhqur paratë.
Por përveç sasisë së stërlinave britanike, ka pasur edhe rroba, kryesisht këpucë dhe xhupa, që ishin blerë për familjarët.
Shoferi që udhëtonte si taksi nga Shkodra në Britani, kryesisht këtë punë bën; dërgon ushqime e merr para e rroba.
Por gjithsesi, duhet thënë se rruga e qarkullimit të monedhave nuk është normale dhe ligjore. Sipas ligjit shqiptar, askush nuk mund të lëvizë me një shumë më të madhe se 10 mijë euro. Gjithsesi, skandali i madh është se policia dhe dogana kanë abuzuar, duke deklaruar se kanë kapur një “grup kriminal”.
Madje mediave, u dha pa asnjë verifikim, lajmi se “paratë i përkisnin një personi të lidhur me ambiente kriminale”.
Në mënyrë krejt të pistë, duke pasur parasysh se nuk do të ketë gjyq apo padi për këtë çështje, pasi në fund janë para jashtë bankave, policia po e lidh me ambient kriminal, duke përdorur hallin e disa emigrantëve për të “luftuar krimin” që në fakt bën të kundërtën. E nuk është çudi që i kanë vënë syrin edhe lekëve…/Pamfleti
