Gëzim Gjyrezi, ish gazetar në RTSH tregon detaje për gjyqin e masakrës së 2 prillit 1991 në Shkodër. Gjyrezi tregon se si shkoi në seancën e gjyqit si gazetar dhe se si prokurori i tregoi që Arben Brocin e kishin qëlluar me shtizë për të prishur gjurmët.
“Kur u bë gjyqi i 2 prillit në Shkodër, kam shkuar atje si gazetar i RTSH bashkë me Bajram Hoxhën. Ato që bërtisnin “Liri, demokraci”, asnjërit nuk ia mbante të shkonte në gjyqin e Shkodrës.
Kemi shkuar me Bajramin dhe kemi parë njerëz me revole dhe me bomba në brez, por ne nuk na luajti kurrkush. Gjyqi filloi në kinema Republika në Shkodër dhe unë njihja prokurorin që ishte Viktor Konomi dhe në një seancë pushimi e pyes prokurorit për Arben Brocin, a e kanë vrarë nga afër apo e kanë vrarë nga larg?
Prokurori më thotë që përveçse e kanë vrarë atij i kanë futur edhe një shtizë edhe është prishur gjurma edhe nuk e zbulojmë dot çfarë armë ka qenë ajo që e ka qëlluar Arben Brocin, a ka qenë armë e policisë, armë e ushtrisë apo armë e njerëzve afër tij.
Këtë e ka pohuar në një libër edhe Gjek Çelaj, zëvendës shefi i policisë së Shkodrës, atë e kanë mbajtur në burg pa vendim burgu sepse si Sali Berisha dhe Ramiz Alia ia dridhnin muhabetin dhe donin ta mbanin në burg, sepse po ta nxirrte Ramizi nga burgu Saliu do thoshte ja ky komunisti e nxori nga burgu, por edhe Ramiz Alia nuk i thoshte dot Sali Berishës nxirre nga burgu.
Dmth ishte një konglomerat gjërash që nuk zgjidheshin. Drejtësia ishte në pikën e hallit.”u shpreh Gëzim Gjyrezi në emisionin “Shqip”.
