Çelsi është në shitje, por kërkesa minimale e Roman Abramoviçit për klubin londinez është 3.3 miliardë euro dhe mund t’i shkurajojë pak blerësit e mundshëm.
Sipas shtypit anglez, nuk ka më dyshime për planet e oligarkut rus, gjithmonë e më i padëshiruar në Britaninë e Madhe, ndaj dhe kërkon që të shesë sa më parë asetet angleze. Duke nisur nga Çelsi, klubi që e bleu 2003-shin për 150 milionë euro dhe që e çoi në çatinë e botës, por tani duhet ta shesë.
Milioneri zviceran Hansjorg Wyss, me një pasuri personale prej gati 5 miliardë euro, duket se ka nisur kontaktet për blerjen e Çelsit. “Si të gjithë oligarkët rusë, (Abramoviç) është në panik, – ka thënë Wyss. – Ai do që të shesë të gjitha pasuritë në Angli dhe dëshiron të lirohet edhe nga Çelsi sa më shpejt.
Unë, si shumë të tjerë, kam marrë një ofertë nga Abramoviç për të blerë Çelsin. Duhet të pres 4-5 ditë, por momentalisht Abramoviç kërkon shumë. Mund të bashkohem te Çelsi me partnerë të tjerë, por më parë duhet të shoh kushtet”.
Ditët e fundit ka pasur lajme se Abramoviç kërkon të shesë edhe pasuritë e paluajtshme në Angli, kështu mund t’u shpëtojë sanksioneve ekonomike të qeverisë britanike për oligarkët rusë pranë Putinit. Sipas ‘Daily Mail’, Abramoviç i ka kaluar javët e fundit në Emiratet e Bashkuara Arabe, ku ka në plan të transferojë pasuritë e tij.
