Ndizen motorët e luftës kundër korrupsionit. Prokuroria e Posaçme kohët e fundit është fokusuar kryesisht te grupet kriminale, mirëpo nuk do të jetë e largët dita kur në skaner të kalojnë dhe zyrtarët e lartë.
Organi që do të jetë kompetent për hetimin e politikanëve është padyshim Byroja Kombëtare e Hetimit. Procesi për ngritjen e saj ka kaluar në shumë filtra, por duket se tashmë po shkohet drejt fazës finale. Një komision i ngritur në Prokurorinë e Posaçme, prej muajsh ka kaluar në filtër të gjithë kandidatët për drejtorin e BKH dhe vetëm 4 emra u kualifikuan për në fund.
Më konkretisht: Aida Veizaj; Artur Beu; Ervin Hodaj; Idajet Faskaj. Sipas burimeve, tashmë ka përfunduar verifikimi final i tyre qoftë për pasurinë, qoftë për pastërtinë e figurës dhe karrierën dhe tashmë do të zgjidhet emri që do të drejtojë Byronë Kombëtare të Hetimit, një organ që realisht është investim amerikan, pasi do të jetë identik me FBI.
Sipas burimeve të gazetës, ditën e hënë pritet të përzgjidhet emri final dhe ndër emrat që përflitet si më favorit është ai i Ervin Hodaj, i cili shihet më favorit krahasuar me kandidatët e tjerë. Ndërkohë nuk mbetet pas as Aida Veizaj. Megjithatë i takon komisionit të vendosë se kush do të ketë në dorë BKH. Me zgjedhjen e drejtorit, nis menjëherë puna për të kompletuar Byronë.
Pritet që të përzgjidhen plot 60 hetues që do të jenë gardianët e luftës ndaj korrupsionit. Sipas parashikimeve, rreth shtatorit BKH do të jetë funksionale. Duhet theksuar se lufta ndaj korrupsionit dhe funksionaliteti i SPAK dhe BKH është një ndër kushtet e Bashkimit Europian për hapjen e negociatave.
Kjo do të thotë se në shtator mund të ngrihet sipari i goditjeve të bujshme. Amerikanët e kanë thënë disa herë që mos prisni shumë nga SPAK sepse mungon BKH. Kjo do të thotë që me ngritjen e këtij organi hapet dhe rruga e hetimeve në nivele të larta. BE e ka kush hetimin e politikanëve dhe sinjalet janë se vjeshta do të sjell zhvillime.
Roli i amerikanëve
Shpresat se BKH do të ngrejë siparin e arrestimeve janë shtuar pasi ky organ do të jetë në dorë të amerikanëve. Deri më sot politika ka mbajtur në presion gjyqtarë e prokurorë, por me BKH sharra do u ngecë në gozhdë. Por si SHBA do të marrë në dorë BKH? Te faqja zyrtare e BKH janë treguar me detaje rolet që do të kenë institucionet amerikane, që nga FBI, deri te ICITAP.
Në faqen zyrtare bëhet me dije se rolin kryesor në ngritjen e BKH e ka padyshim FBI. Byroja Federale e Hetimit do të asistojë për vite me radhë që bosët e krimit dhe të korruptuarit të shkojnë pas hekurave. “Në vitin 2016 u ra dakord që Qeveria e SHBA-ve do të ndërmerrte rolin udhëheqës në krijimi e Byrosë Kombëtare të Hetimit. Qeveria Shqiptare shprehu dëshirën që BKH-ja të reflektonte ngushtësisht standardet profesionale dhe praktikat më të mira të Byrosë Federale të Hetimit (FBI).
Kjo ambicie ka rezultuar në procesin e mëposhtëm të përzgjedhjes për BKH-në, që ndjek të njëjtin model si FBI-ja dhe një regjim trajnimi që do të sigurohet në mënyrë të drejtëpërdrejtë ose jo nga trajnerët e FBI-ja. Mbi 60 persona të përzgjedhur do të shkojnë në SHBA në vitin 2020 për t’iu nënshtruar trajnimit në Akademinë e FBI-së në Kuantiko, Virxhinia”, thuhet më tej.
BKH, me drejtori rajonale
Fokusi i BKH nuk do jenë vetëm pushtetarët e Tiranës, pasi në skaner do kalojë dhe pushteti vendor. Sapo të ngrihet njësia qendrore e BKH në Tiranë, më pas do ngrihen dhe disa degë të saj në qarqet kryesore të vendit, ku ka dyshime për krim të organizuar dhe rritje të korrupsionit.
“Gjykatat kundër korrupsionit dhe krimit të organizuar dhe Struktura e Posaçme kundër korrupsionit dhe krimit të organizuar e kanë vendndodhjen në Tiranë dhe e ushtrojnë juridiksionin e tyre penal në të gjithë territorin e Shqipërisë. Byroja Kombëtare e Hetimit mund të krijojë zyra të përkohshme ose të përhershme jashtë Tiranës, për të përmbushur qëllimin e saj”, thuhet në nenin 10 të ligjit për luftën ndaj korrupsionit. Pra, teksa politika po punon fort në prapaskenë me lloj-lloj aleancash, amerikanët tashmë po ngrenë në këmbë BKH dhe përmes këtij organi do u jepet fund pazareve.
