Pas kërkesës së përsëritur të Edi Ramës, që të bashkëpunojë me opozitën, Bilushi i Metës i dërgoi sot një letër të hapur Lul Bashës ku e këshillon si të veprojë dhe si të ruhet nga Edi Rama.
I dashur Luli!
Siç e shikon ndodhi ajo që pritej. Edi Rama pasi vodhi zgjedhjet e 25 Prillit, nuk ka më burime njerëzore për të qeverisur. Ai nuk ka më kuadro, nuk ka më njerëz për ministra apo drejtora. Ai e di mirë se njerëzit e aftë, të zot dhe të përkushtuar janë në opozitë. Për këtë ka vendosur të t’i vjedhë me takt.
Në fillim të fton ty të bashkëpunosh me të, pastaj do të kërkoj ty të hysh në qeveri apo t’i japësh atij disa njerëz për poste të rëndësishme, dhe sapo ti t’i japësh emrat, ai do t’i vjedhë ata.
Edi Rama njihet si njeri që u vjedh shokët, shokëve. Dhe ty ka për të të vjedhur kuadrot e PD.
Po ta vësh re, ka dhe diçka tjetër interesante. Ai beson se ti do fitosh në krye të partisë dhe kërkesën ta bën vetëm ty, jo atyre tre të tjerëve. Edhe kjo është një shenjë që ai ka një plan për t’i vjedhur PD dhe opozitës, pasurinë e fundit që i ka mbetur, kuadrot e partisë dhe të na lërë pa njeri rrugëve. Tani dëgjova që dhe Mziut i ka dhënë leje ndërtimi për hotel në Golem. Po na morën dhe heronjtë ne mbetëm rrugëve.
Në këto kushte duhet bërë kujdes me ata ministrat teknikë që i çove në 2017 në qeveri se atyre mund t’u ketë gjetur anën dhe t’i vjedh. Po ashtu kujdes dhe me ata që vure në krye të agjensive se dhe ata mund të t’i vjedhë.
Por më e rrezikshme është se mund të të marrë kuadrot e tjerë afër partisë që muajin e fundit bënë gati dhe vendet e punës. Edi Rama mund të ketë gjetur letrat ku ata kanë bërë planet se ata i bënin nëpër kafenera, dhe mund të t’i marrë. Kjo do jetë katastrofë e opozitës.
Ndaj të kërkoj publikisht që jo vetëm ta refuzosh Edi Ramën duke mos bashkëpunuar me të, por ta izolosh që të qeverisë i vetëm dhe ti dridhet shpirti, për një çikë opozitë.
Vetëm kështu ai do ta ndjejë nevojën tonë dhe mund të na lërë pushtetin mandatin e katërt.
