Nga Adriatik Doci
Rrit madhesinë e shkrimit Zvogëlo madhesinë e shkrimit
Për disa javë me radhë akuzoi qeverinë se nuk kishte marrë në kohë masat për parandalimin e covid-19, ndërsa ditët e fundit, duke parë se skenarët e tij me qindra të vdekur po mbeten thjeshtë një ëndërr, Sali Berisha po bën thirrje për protesta kundër masave kufizuese të autoriteteve shtetërore. Madje disa orë më parë Berisha u ka bërë thirrje të riatdhesuarve të thyejnë karantinën. Ndërkaq, në 29 shkurt 2020, akuzoi kryeministrin se po përhapte koronavirusin përmes Kongresit të Partisë Socialiste, ndërsa tre ditë më vonë, në 3 mars 2020, përshëndeti protestën e zhvilluar një ditë më parë (2 mars), kundër qeverisë.
Kjo është trajektorja e çmendur e paradokseve të Sali Berishës, në përpjekje për të përfituar politikisht nga pandemia, përmes mashtrimeve, dezinformimit, manipulimit të realitetit dhe përhapjes së panikut. Më poshtë po sjellim një kronologji të qëndrimeve paradoksale të Sali Berishës në raport me covid-19, qëndrime të cilat mohojnë dhe hedhin poshtë njëra-tjetrën, duke nxjerrë edhe një herë në pah dimensionin dezinformues të ish-kryeministrit gjatë një periudhe kritike për vendin.
Po ashtu, gjatë dy ditëve të fundit, Berisha po tenton ta zhvendosë ofensivën e tij nga covid-19, duke u fokusuar tek çështje të tjera, si tek bllokimi i një videoje me përmbajtje pornografike dhe tek frika e madhe për humbjen e zgjedhjeve të 2021 nga PD. Sinjalin se nuk ka më asnjë shpresë për të përfituar kapital politik nga covid-19 e dhanë së fundmi ish-deputetët Oerd Bylykbashi dhe Luan Rama, të cilët pranuan se masat e ndërmarrave rezultuan të efektshme në frenimin e përhapjes së covid-19.
Si ndryshuan qëndrimet e Berishës për interesa politike për covid-19
-29 shkurt 2020, Berisha akuzon Ramën përhapje të covid-19 me kongresin e PS
“Edvin Çekapi dhe Ndrikull Hajnia, po fshehin rastet me koronavirus për shkak se do mbanin Kongresin që hyri në analet e historisë së krimit si Kongresit i Koronavirusit, Lindës dhe Gjushit”.
-3 mars 2020, Berisha përshëndet protestuesit: 500 mijë dolën në shesh kundër qeverisë
“Populli, i vendosur të mbrojë Kushtetutën dhe të përmbysë narkoshtetin dhe puçin e tij! Nderim të madh 500 000 qytetarëve, që i dolën zot, Kushtetutës në Tiranë dhe i futën tmerrin në shpirt dhe lepurin në bark, narkoshtetit dhe kreut të tij, puçistit Edvin Mafisë. Rama ik! Fitore!”.
-19 mars 2020, Berisha akuzon qeverinë se nuk mori masat në kohë
“Nuk merrej asnjë masë, na thuhet se nuk është ndonjë gjë, na thuhej se 97% shërohen. Dilte zëdhënësja e tyre në media dhe thoshte po pres me padurim rastin e parë të koronavirusit. Për të mos thënë se kishte një vdekje jashtëzakonisht të dyshimtë në Korçë”.
-2 prill 2020, Berisha flet për qindra viktima
“Dhjetëra e qindra të sëmurë me covid 19 do vdesin në shtëpitë e tyre apo spitale duke ju mohuar mjekimi”.
-20 prill 2020, Berisha thirrje për protesta kundër masave të qeverisë
“Gjykata Kushtetuese e Gjermanisë i dha të drejtë qytetarëve të protestojnë. Unë ftoj shqiptarët ta konsiderojnë letër të vdekur deklarata skizo të Ramës të ngrihen në protesta, me maska dhe në distancë sociale. Nëse ka një popull sot në botë që duhet të jetë në rrugë janë shqiptarët. Po u tolerua me këtë mënyrë, njësoj si i ati i Kim Jong Un, do t’ju numërojë lugët. Duhet ngritur ndaj kësaj çmendurie poshtëruese dhe një njeriu që nuk ka moral”.
-21 prill, Berisha thirrje për thyerjen e karantinës
“Ju bëj thirrje të rikthyerve të refuzojnë të gjithë karantinën për të mbushur xhepat Rama -Abazi dhe ta bëjnë atë në shtëpitë e tyre”. /Shqiptarja.com
