Ish-presidenti Bamir Topi komentoi foton e publikuar dje në media, ku ish-kryeministri Sali Berisha shfaqet në shtëpinë e Enver Hoxhës, në prani të diktatorit dhe familjes së tij.
Teksa ishte i ftuar në një studio televizive, ish-presidenti Topi theksoi se nuk është surprizuar nga ky lajm, pasi sipas tij, të gjithë e dinë që Berisha ka qenë besnik i ish-diktatorit Hoxha dhe komunist i devotshëm.
Madje, ai e ka lidhur fotografinë me platformën e Katovicës, sipas të cilës, pas rrëzimit të komunizmit në vendet lindore të Evropës ish-komunistët do ishin përsëri në pushtet në një formë tjetër.
“Ka disa rubrika si “Foto që flasin vetë”, apo edhe “Një foto sa 1 mijë fjalë”. Kjo është foto sa një mijë fjalë. Çfarë të them unë? Shiko, të gjithë politikanët pas vitit 1990 nuk janë prodhuar nga institute të kualifikuara për politikë.
Secili erdhi nga profesione të ndryshme. Zgjidhjet politike nuk kanë qenë më të mençurat, por kanë qenë nga rrethanat apo papjekuria. Çështja është se askush nuk e kthen kokën se çfarë ka ndodhur në këto 30 vite në Shqipëri nga orientimet që Gorbaçovi i dha në prag të ndryshimeve të mëdha për të gjitha vendet e Lindjes”, deklaroi ai.
Po ashtu, ish-presidenti Topi akuzoi ish-kryeministrin Berisha se në vitin 2006 refuzoi miratimin e ligjit të lustracionit.
Keni një analizë shumë realiste të profesor Servet Pëllumbit. Përse nuk e ktheni kokën atje për të parë kush hyri në politikë, nga hynë dhe sa bashkëpunëtorë të Sigurimit të Shtetit kishte në prurjet në politikë, edhe të krahut të djathtë, dhe përse nuk u bë ligji për bashkëpunëtorët dhe lustracionin.
E kërkova në vitin 2006 lustracionin së bashku me zotin Majko dhe u pengua kjo nismë. Këtu nis e gjitha te “Katovica”, u shpreh ai. Ndërkohë Topi ka bërë edhe shpjegimin konkret të fotografisë, duke shquar edhe emra të tjerë që janë fiksuar në këtë fotografi.
“Unë shikoj në këtë foto Enver Hoxhën, Nexhmije Hoxhën në pritje, domethënë ata që e kanë pritur profesor Isuf Kalon, Sali Berishën dhe i treti është ish-kryetari i Urdhrit të Mjekëve, Dine Abazi”, nënvizoi Topi.
