Aleatët e Partisë Demokratike kanë shtuar presionet ndaj kryedemokratit Lulzim Basha sa i takon strategjisë që opozita joparlamentare duhet të ndjekë për zgjedhjet parlamentare të 25 qershorit të vitit 2021.
Ditën e djeshme kreu i Partisë Agrare Ambientaliste, Agron Duka; kreu i Partisë Republikane, Fatmir Mediu dhe kreu i Partisë Demokristiane, Nard Ndoka i kanë dërguar një mesazh Bashës se duhet të veprojnë dhe organizohen. Fillimisht ka qenë zoti Duka, i cili gjatë një prononcimi për gazetën “SOT”, u shpreh dje se ai mbështet daljen e opozitës së bashkuar në zgjedhjet e 25 prillit me dy lista, pasi sipas tij, kjo është një mënyrë për të maksimizuar votat.
“Unë e kam thënë dhe po e ripërsëris që në mendimin tim gjykoj se një listë e vetme është e pamundur. Megjithatë ne jemi në bisedime dhe nuk e kemi vendosur ende. Por personalisht unë mendoj që opozita e bashkuar në zgjedhjet parlamentare të 25 prillit të vitit tjetër duhet të dalë me dy lista, në mënyrë që të mos lejojmë që asnjë votë të shkojë dëm”, deklaroi kreu i PAA, Agron Duka.
Duhet platformë e qartë përballë Ramës
Por edhe pse na ndajnë edhe gati 6 muaj nga mbajtja e zgjedhjeve parlamentare të 25 prillit, kreu i PR, Fatmir Mediu i ka dërguar një mesazh kryedemokratit Basha që të nxitojë me përzgjedhjen e kandidatëve për deputetë dhe madje ka kërkuar që opozita duhet të dalë me një platformë të qartë përballë kryeministrit Edi Rama.
Gjatë një reagimi për gazetën “SOT”, zoti Mediu theksoi se në kushtet kur kryeministri Rama nuk do zgjedhje të lira dhe synon që t’i grabisë ato, sipas tij, opozita duhet të bëhet barrikadë për të mos lejuar shtrembërimin e rezultatit zgjedhor dhe vjedhjen e votës. “Për mendimin tim opozita e bashkuar duhet të jetë bashkë për të ndërtuar atë që duan të gjithë shqiptarët. Mendoj se duhet të nxitojmë jo për koalicionin opozitar, por të ndërtojmë trupën elektorale dhe qeverisëse. Opozita duhet të kishte një platformë të qartë dhe të përbashkët.
Edi Rama nuk do zgjedhje të lira dhe të ndershme. Rama do të vjedhë zgjedhjet”, deklaroi kreu i Partisë Republikane, Fatmir Mediu. Ndërkohë, kreu i PDK, Nard Ndoka gjatë një prononcimi për gazetën “SOT”, u shpreh dje i bindur se opozita e bashkuar do t’i fitojë zgjedhjet parlamentare të 25 prillit të vitit 2021.
Në këtë kontekst, zoti Ndoka theksoi se Partinë Socialiste dhe kryeministrin Edi Rama nuk e shpëton askush nga humbja, pavarësisht trukeve që po përpiqen të bëjnë. Sipas tij, opozita e bashkuar është shumicë dhe se do të bëjë çdo gjë për të maksimizuar votat e saj. “Opozita po shikon të gjithë variantet e mundshme për maksimalizimin e votës.
Ne çdo variant Edi Rama është i pashpresë, tentativat e tij për ndryshimin e rregullave te garës në mënyrë të njëanshme, kriminale dhe e pa precedent nuk kanë për ta shpëtuar. Opozita e bashkuar do t’i fitojë zgjedhjet e 25 prillit”, deklaroi kreu i Partisë Demokristiane, Nard Ndoka. Kujtojmë që një ditë pas miratimit të ndryshimeve në Kod, që sanksionuan në ligjin e ri zgjedhor ndalimin e koalicioneve parazgjedhore, me listë të përbërë, Lulzim Basha mblodhi aleatët në selinë blu.
Sikundër u mësua dhe gazeta e bëri publike pak ditë më parë skenari i parë është dalje me dy lista, një e udhëhequr nga Partia Demokratike dhe një e udhëhequr nga Lëvizja Socialiste për Integrim. Ndërsa një tjetër opsion që po vlerësohet pas ndryshimeve më të fundit në Kodin Zgjedhor me qëllim maksimizimin e votave është edhe dalja me një listë unike, por vendimmarrje finale do të përcaktohet pas kalkulimeve të ekspertëve të opozitës./Rigels Seliman
